"दादा, आम्हाला माफ करा; आता आवाज काढावा इतका पण...", आमदार अमोल मिटकरींची अजित पवारांसाठी भावूक पोस्ट

Amol Mitkari post on Ajit Pawar: विधिमंडळाच्या अर्थसंकल्पीय अधिवेशनात अजित पवार यांच्या अपघाती मृत्युचा मुद्दा चर्चिला जाईल असे बोलले जात होते, मात्र तसे काही झाले नाही. 

"दादा, खरंच मोठ्या मनाने माफ करा. आम्ही कपाळ करंटे", असे भावनिक विधान करत राष्ट्रवादी काँग्रेसचे आमदार अमोल मिटकरी यांनी दिवंगत अजित पवारांची माफी मागितली. राज्याच्या अर्थसंकल्पीय अधिवेशनात अजित पवार यांच्या अपघाती मृत्युबद्दल चर्चाच न झाल्याने आमदार मिटकरींनी तीव्र शब्दात नाराजी बोलून दाखवली. 

आमदार अमोल मिटकरी यांच्याकडून सातत्याने अजित पवार यांचा विमान अपघातात झालेल्या मृत्युच्या विषयावर चर्चा करण्याची मागणी होत आहे. मात्र, विधान परिषदेबरोबरच विधानसभेतही याबद्दल फार चर्चा झालेली नाही. आमदार मिटकरी यांनी माध्यमांशी बोलताना याबद्दल अनेकदा खंत व्यक्त केली. त्यानंतर आता एक भावूक पोस्ट केली आहे. 

अदृश्य शक्ती चर्चा लाऊ देत नाही?

आमदार अमोल मिटकरींनी गंभीर मुद्दा उपस्थित केला आहे. ते म्हणाले की, 'उपमुख्यमंत्री अजित पवार यांच्या विमान अपघात दुर्घटनेची चर्चा तिसऱ्या आठवड्यात पण... दुर्दैवाने एकही ठोस चर्चा नाही. अदृश्य शक्ती चर्चा लाऊ देत नाही, अशी शंका उपस्थित करावी का, की सरकार झोपेत आहे?", असा संतप्त सवाल करत त्यांनी सरकार जागे व्हा, सत्य बाहेर आणा आणि जबाबदारी निश्चित करा", अशी मागणी केली आहे. 

'दादा, आम्हाला माफ करा' 
 
आमदार अमोल मिटकरींनी अजित पवारांची माफी मागणारी एक पोस्ट लिहिली आहे. "आदरणीय दादा, आम्हाला माफ करा. आता आवाज काढावा इतका पण आवाज शिल्लक नाही. लोकांच्या प्रपंचाला व सामान्य अतिसामान्य माणसाला न्याय देणारे तुम्ही दुर्दैवाने तुम्हालाच न्याय नाही", अशी खंत मिटकरींनी व्यक्त केली आहे. 

आदरणीय दादा आम्हाला माफ करा..आता आवाज काढावा इतका पण आवाज शिल्लक नाही.लोकांच्या प्रपंचाला व सामन्यअति सामान्य माणसाला न्याय देणारे तुम्ही दुर्दैवाने तुम्हालाच न्याय नाही .आज इतर कुणासोबत अशी दुर्घटना घडली असती व तुम्ही आज असता तर सगळे सुतासारखे सरळ केले असते व चर्चा लावली असती.… pic.twitter.com/MyS71XK7zY

— आ. अमोल गोदावरी रामकृष्ण मिटकरी (@amolmitkari22) March 16, 2026

"आज इतर कुणासोबत अशी दुर्घटना घडली असती व तुम्ही आज असता तर सगळे सुतासारखे सरळ केले असते, व चर्चा लावली असती. मात्र, या मागील अदृश्य शक्ती ओळखता येत नाहीये. दादा, खरंच मोठ्या मनाने माफ करा. आम्ही कपाळ करंटे", अशा भावना मिटकरींनी व्यक्त केल्या आहेत.