"अजित पवारांशी बोलणं करून देते..."; विमान अपघातात जीव गमावणाऱ्या पिंकीने वडिलांना दिला होता शब्द

Plane Crash in Baramati: फ्लाईटमध्ये गेल्यानंतर अजित पवारांशी तुमचं बोलणं करून देईन असं तिने वडिलांना सांगितले होते.

मुंबई - बारामती येथे भीषण विमान अपघातात राज्याचे उपमुख्यमंत्री अजित पवार यांचे निधन झाले. अजित पवारांसोबत विमानात प्रवास करणाऱ्यांमध्ये पिंकी माली या तरुणीचाही समावेश होता. या अपघातात अजित पवारांसह अन्य ४ जणांचा मृत्यू झाला. त्यातील महिला फ्लाईट अटेन्डेंट पिंकी माली हिचेही निधन झाले आहे. पिंकी माळी अजित पवारांसह चौथ्यांदा विमान प्रवास करत होती. मात्र २८ जानेवारीची सकाळ तिच्या आयुष्यातील अखेरची ठरली. 

कोण होती पिंकी माली?

पिंकी माली २९ वर्षाची होती. ती वरळीतील सेन्चुरी मिलजवळील क्वार्टरमध्ये राहत होती. पिंकीच्या निधनानंतर तिच्या घरच्यांवर दु:खाचा डोंगर कोसळला. तिचे वडील शिवकुमार माली म्हणाले की, पिंकी खूप आनंदी होती. फ्लाईटमध्ये गेल्यानंतर अजित पवारांशी तुमचं बोलणं करून देईन असं तिने म्हटलं होते. सकाळी तिने भावाला कॉल केला होता. त्यावेळी ती दौऱ्यावर जात होती. मात्र त्यानंतर तिच्याशी कुठलाही संपर्क झाला नाही असं तिच्या घरच्यांनी सांगितले.

तर पिंकी मालीसोबत अखेरच्या संवादात ती बारामतीहून नांदेडला जाणार होती असं कुटुंबाला सांगितले. पिंकी माळी अजित पवारांसोबत दौरा करताना खूप आनंदी होती. मात्र पिंकीचा हा आनंद आता तिच्या कुटुंबापासून हिरावून घेतला आहे. या विमान अपघातानंतर तिचे घरचे आणि नातेवाईकांवर मोठा आघात झाला. पिंकीचे वडील शिवकुमार माली हे राष्ट्रवादी काँग्रेसचे माजी तालुका अध्यक्ष आहेत.  पिंकी मालीचे वडील शिवकुमार हे लहानपणापासून मुंबईत वाढले आहेत. मागील ८ वर्षापासून त्यांची लेक एअर हॉस्टेस म्हणून काम करत होती. 

प्रत्यक्षदर्शीने सांगितली थरारक घटना

दरम्यान, बारामतीतील विमान अपघात किती भयानक होता याचा अंदाज तिथल्या प्रत्यक्षदर्शीने सांगितलेल्या गोष्टीवरुन येते. मी माझ्या डोळ्याने पाहिले, विमान खाली येत होते. ते खाली कोसळणार असे वाटत होते आणि तेच झाले. विमान खाली कोसळल्यानंतर मोठा स्फोट झाला. आम्ही घटनास्थळाच्या दिशेने धावलो. तिथे आग लागली होती. काही जण बाहेर पडण्याचा प्रयत्न करत होते परंतु आग इतकी जास्त होती की कुणाला मदत करता आली नाही. अजित पवार या विमानात प्रवास करत होते. ते आमच्यासाठी खूप वेदनादायी होते असं प्रत्यक्षदर्शींनी सांगितले.