ZP Election 2026: अर्ज छाननीवेळी 'आप'च्या उमेदवाराचा हृदयविकाराने मृत्यू

अचानक चक्कर आली आणि ते खाली कोसळले

देवरूख (जि. रत्नागिरी) : जिल्हा परिषद आणि पंचायत समिती निवडणुकीसाठी दाखल झालेल्या अर्जांच्या छाननीदरम्यान आम आदमी पार्टीचे उमेदवार सुजित गणपत सुर्वे (वय ५८) यांचा हृदयविकाराच्या धक्क्याने मृत्यू झाला. हा प्रकार गुरुवारी संगमेश्वर तालुक्यातील देवरूख तहसील कार्यालयासमाेर घडला. त्यांनी धामणी पंचायत समिती गणातून अर्ज दाखल केला हाेता.

गुरुवारी देवरूख तहसील कार्यालयात अर्जांची छाननी सुरू असतानाच सुर्वे यांना अचानक चक्कर आली आणि ते खाली कोसळले. त्यांना तत्काळ उपचारासाठी देवरूख ग्रामीण रुग्णालयात दाखल करण्यात आले. मात्र, वैद्यकीय सूत्रांनी तपासणी करून त्यांना मृत घोषित केले.

उत्तरीय तपासणीनंतर त्यांचा मृतदेह नातेवाइकांच्या ताब्यात देण्यात आला. सुजित सुर्वे हे संगमेश्वर तालुक्यातील कुंभारखाणी बुद्रुक गावचे रहिवासी होते. त्यांचे पार्थिव मुंबई येथे नेऊन उशिरा रात्री अंत्यसंस्कार करण्यात आले.