ऑटोची दुचाकीला धडक; एकजण जखमी
लातूर : भरधाव वेगातील ऑटो चालकाने चाकूर येथील सोसायटी चौकात फिर्यादी नागनाथ ऊर्फ नागेश तुकाराम कोंबडे यांच्या दुचाकीला धडक दिली. यात ते जखमी झाले असून, दुचाकीचेही नुकसान झाले आहे. याबाबत नागनाथ ऊर्फ नागेश कोंबडे यांनी दिलेल्या फिर्यादीवरून (एमएच २४ ई ५२७६) या क्रमांकाच्या ऑटो चालकाविरुद्ध चाकूर पोलिसात गुन्हा नोंद करण्यात आला आहे.
डीपीतील साडेतीन लाखांच्या ऑईल, क्वाईलची चोरी
लातूर : मरशिवणी येथील श्री रोकडोबा जिनिंग एमआयडीसी नांदेड रोड अहमदपूर येथील डीपीतील ऑईल तसेच तांब्याची क्वाईल असा एकूण ३ लाख ५० हजारांचे साहित्य चोरट्यांनी लंपास केल्याची घटना ८ जूनरोजी घडली.
श्री रोकडोबा जिनिंग एमआयडीसी नांदेड रोड अहमदपूर येथील डीपीतील २५० लिटर ऑईल (किंमत १ लाख ५० हजार) तसेच सहाशे किलो तांब्याची क्वाईल (किंमत २ लाख) असे एकूण ३ लाख ५० हजार रुपयांचे साहित्य चोरट्यांनी चोरले. याबाबत जिनिंग ट्रेसिंग मिलचे व्यवस्थापक व्यंकट विनायक मुळे यांनी अहमदपूर पोलिसात दिलेल्या फिर्यादीवरून अज्ञात चोरट्यांविरुद्ध गुन्हा नोंद करण्यात आला आहे. पुढील तपास पोउपनि. डक करीत आहेत.
जमिनीच्या वादावरून मारहाण
लातूर : निलंगा तालुक्यातील राठोडा येथे जमिनीच्या वादावरून मारहाण झाल्याची घटना घडली. याबाबत तात्याराव निवृत्ती बेवनाळे यांनी दिलेल्या फिर्यादीवरून बब्रुवान निवृत्ती बेवनाळे व अन्य दोघांविरुद्ध निलंगा पोलीस ठाण्यात गुन्हा नोंद करण्यात आला आहे. फिर्यादी व फिर्यादीच्या पत्नीस मारहाण करून जिवे मारण्याची धमकी दिली असल्याचेही तक्रारीत म्हटले आहे.