नागरिकांना केवळ दहा रुपयांत भोजन उपलब्ध करून देणारी योजना महाविकास आघाडीच्या सरकारकडून एप्रिल २०२० पासून राबविण्यात येत आहे. प्रारंभीला या योजनेची सुरुवात जिल्हा आणि मोठ्या शहरांमधून करण्यात आली. त्यानंतर कोरोनाचे संकट सुरू होताच ही योजना तालुकास्तरावर राबविण्याचे नियोजन करण्यात आले. तालुक्याच्या ठिकाणीही शिवभोजन थाळी उपलब्ध करून देण्यात आली. १० रुपयांना असणारी शिवभोजन थाळी कोरोना प्रादुर्भावामुळे शासनाने केवळ पाच रुपयांत लाभार्थ्यांना जेवण देण्याचा महत्त्वाकांक्षी निर्णय घेण्यात आला. शासनाकडून शहरी व ग्रामीण भागासाठी प्रतिथाळी केंद्रचालकांना अनुदान दिले जाते.
लॉकडाऊनच्या काळात अनेक उद्योग, व्यवसाय बंद पडले. अनेकांचे रोजगार बंद झाले. हातावर पोट असणाऱ्या लोकांना दोनवेळचे जेवण मिळणे अवघड झाले. अशावेळी लोकांची उपासमार होऊ नये, यासाठी अहमदपूर शहरात तीन शिवभोजन केंद्रे सुरू करण्यात आली. या केंद्रांच्या माध्यमातून शासनाकडून दररोज ३५० थाळींचे वितरण करण्यात येत आहे. लोकांना पाच रुपयांत भाेजन देण्याच्या सरकारच्या महत्त्वाकांक्षी योजनेला नागरिकांतून चांगला प्रतिसाद मिळत आहे. अहमदपूर तालुक्यात एप्रिल २०२० ते मार्च २०२१ अखेर जवळपास ५ हजारांवर नागरिकांनी याचा लाभ घेतला आहे. लॉकडाऊनच्या कालावधीत अनेकांनी या थाळीचा लाभ घेतला असून, अत्यल्प दरात शिवभोजन उपलब्ध होत असल्याने सर्वसामान्यांमधून समाधान व्यक्त होत आहे. याचा जर ग्रामीण भागात विस्तार केला, तर ग्रामीण भागातील जनतेची सोय होणार आहे.
सामान्यांना परवडणारी थाळी...
कोरोना काळात गोरगरीब जनतेला शिवभोजन थाळीचा माेठा आधार मिळाला आहे. जनतेच्या खिशाला परवडेल असे दर असल्याने जनतेची सोय झाली असून, महाविकास आघाडीने शिवभोजन थाळी हा उपक्रम महत्त्वाचा आहे, असे शिवभोजन थाळी केंद्रचालक आशिष तोगरे म्हणाले, तर अहमदपूर शहरातील कृषी उत्पन्न बाजार समितीतील शिवभोजन थाळी केंद्रातून हमाल, मुनीम, शेतकऱ्यांना याचा लाभ हाेत आहे, असे केंद्रचालक रविशंकर गादगे म्हणाले.