देवणी येथील विविध कार्यकारी सेवा संस्थेचे संचालक मनोहर पटणे यांनी तक्रारीत म्हटले आहे की, १४ जानेवारी २०२० रोजी संस्थेच्या संचालक मंडळाने ठराव घेऊन आपली जिल्हा मध्यवर्ती सहकारी बँकेच्या संचालक मंडळाच्या निवडणुकीसाठी संस्थेचा प्रतिनिधी म्हणून निवड केली होती. तसेच या निवडीचा आणि ठरावाचा लेखी अहवालही मुदतीत सहाय्यक निबंधक कार्यालयास पाठविला होता. मात्र, त्यानंतरच्या काळात गटसचिवांनी नियमबाह्य पद्धतीने ९ एप्रिल २०२१ च्या संचालक मंडळाच्या बैठकीत मागील आपल्या नावे असलेला ठराव बदलून नव्याने संस्थेचे चेअरमन यांच्या नावे जिल्हा मध्यवर्ती बँकेच्या निवडणुकीसाठी प्रतिनिधी म्हणून ठराव घेतला आहे.
विशेष म्हणजे, या गटसचिवाने या संस्थेचा पदभार १४ एप्रिल रोजी घेतला आहे, तर संस्थेचा ठराव हा ९ एप्रिल रोजी घेतला असल्याचे लेखी पुरावेही पटणे यांनी सादर केले आहेत. या सर्व प्रकाराची वरिष्ठ पातळीवरून सखोल चौकशी व्हावी आणि गटसचिव व त्यांना मदत करणारे वरिष्ठ अधिकाऱ्यांवर योग्य ती कार्यवाही करावी, अशी मागणी केली आहे.