Latur: पुढे चोर आहेत म्हणत दाम्पत्यास लुटले; दुचाकीस्वाराने पाठलाग करून एकास पकडले

पाठलाग करून काही अंतरावरच रेल्वे गेटजवळ तिघांपैकी एकास दुचाकीसह पकडून ठेवले

उदगीर (जि. लातूर) : येथून शेल्हाळ मार्गे भवानी बिजलगावकडे जाणाऱ्या रस्त्यावर शेल्हाळ गावापुढील महादेव मंदिरासमोर रस्त्यावर दाम्पत्याच्या दुचाकीसमोर दुचाकी आडवी लावून पुढे चोर आहेत म्हणत, महिलेच्या गळ्यातील सोन्याचे दागिने व रोख २५ हजार रुपये पळवून घेऊन गेले. मात्र पाठीमागून येणाऱ्या दुचाकीस्वाराने पाठलाग करून काही अंतरावरच एका चोराला रेल्वे गेटजवळ पकडून पोलिसांच्या ताब्यात दिले.

उदगीर येथून शेल्हाळ मार्गे भवानी बिजलगावकडे फिर्यादी हे पत्नीसह दुचाकीवरून जात असताना शेल्हाळ गावापुढे महादेव मंदिर जवळ समोरून दोन दुचाकीवरून तीन अनोळखी व्यक्ती येऊन दुचाकी आडवी लावून सांगितले की, पुढे चोर आहेत अंगावरील दागिने काढून बॅगमध्ये सुरक्षित ठेवा. त्यामुळे फिर्यादीच्या पत्नीने तिचे अंगावरील सोन्याचे दागिने काढून बॅगमध्ये ठेवत आसताना हातातील गळ्यातील काळी मण्याची सोन्याची एक तोळ्याची पोत व कानातील पाच ग्रॅम सोन्याचे झुमके व दमदाटी करून फिर्यादीच्या खिशातील २५ हजार रुपये रोख रक्कम हिसकावून घेऊन दुचाकीवरून पळून गेले.

तेवढ्यात पाठीमागून एक दुचाकीस्वार आला. त्याने पाठलाग करून काही अंतरावरच रेल्वे गेटजवळ तिघांपैकी एकास दुचाकीसह पकडून ठेवले व पोलिसांना बोलावून त्या चोराला ताब्यात दिले. याप्रकरणी ज्ञानोबा गणपतराव खटके (रा. भवानी बिजलगाव, ता. कमलनगर, जि. बिदर) यांच्या फिर्यादीवरून उदगीर ग्रामीण पोलिस ठाण्यात बाकरअली अहमदअली (रा. शिवाजी नगर, इराणी गल्ली, परळी) व इतर दोन अनोळखी व्यक्ती यांच्या विरोधात गुन्हा नोंद करण्यात आला आहे.