जिल्हाधिकारी कार्यालयाच्या सभागृहात आयोजित लातूर कृषी उत्पन्न बाजार समितीकडून खरेदी करण्यात आलेल्या दहा व्हेंटिलेटर लोकार्पण कार्यक्रमात पालकमंत्री देशमुख बोलत होते. यावेळी जिल्हाधिकारी पृथ्वीराज बी. पी., बाजार समितीचे सभापती ललितभाई शहा, मनोज पाटील, अधिष्ठाता डॉ. सुधीर देशमुख, जिल्हा शल्यचिकित्सक डॉ. लक्ष्मण देशमुख, जिल्हा आरोग्य अधिकारी डॉ. गंगाधर परगे, माजी आ. वैजनाथ शिंदे, विजयकुमार ढगे यांची उपस्थिती हो.ती
पालकमंत्री म्हणाले, पणन विभागाच्या शासन निर्णयानुसार कोविडच्या प्रतिबंधासाठी दहा व्हेंटिलेटर खरेदी करून ते प्रशासनाला सुपुर्द करणारी लातूरची कृषी उत्पन्न बाजार समिती हे राज्यात पहिली आहे. जिल्ह्यातील इतर कृषी उत्पन्न बाजार समित्यांनी साथ रोग नियंत्रणासाठी प्रशासनाला सहकार्य करावे. दुसऱ्या लाटेत जिल्हा प्रशासन व आरोग्य प्रशासनाने नियोजन बद्ध केलेल्या कामगिरीमुळे जिल्ह्यात एकही अनुचित घटना घडलेली नाही. याबद्दल पालकमंत्री अमित देशमुख यांनी जिल्हाधिकारी पृथ्वीराज बी.पी. व प्रशासनाचे कौतुक केले. तसेच संभाव्य तिसऱ्या लाटेच्या अनुशंगाने जिल्हा प्रशासनाने केलेल्या तयारीबद्दल समाधान व्यक्त केले.
शंभर दिवसांत लसीकरणाचे नियोजन...
नागरिकांनी कोरोना प्रतिबंधात्मक उपाययोजनाचे तंतोतंत पालन करणे अत्यंत गरजेचे आहे. जिल्ह्याला लसीचा नियमितपणे पुरवठा झाला तर प्रशासनाने शंभर दिवसात जिल्ह्यातील शंभर टक्के नागरिकांचे लसीकरण करण्याचे नियोजन केलेले आहे. लसीचा तुटवडा असल्याने पुढील काळात वेळेत लस मिळेल यासाठी प्रयत्न केले जाणार असून किमान एका वर्षाच्या काळात जिल्ह्यातील सर्व नागरिकांचे लसीकरण करण्याचे नियोजन असल्याचेही पालकमंत्री अमित देशमुख म्हणाले.