कोल्हापूर : दुसऱ्या लाटेत कोरोना विषाणूने कोल्हापूरकरांच्या छातीत धडकी भरवली आहे. रोजच्या कोरोना रुग्णांच्या संख्येत कोल्हापूर शहर गेल्या काही दिवसांपासून जिल्ह्यात आघाडीवर राहिले असून, सध्या २९५ सक्रिय कोरोना रुग्ण उपचार घेत आहेत. दुसरीकडे कोरोना प्रतिबंधात्मक लस घेण्यासाठीही नागरिकांची गर्दी वाढत चालली आहे. शनिवारी ३,३३५ व्यक्तींना लसीकरण करण्यात आल्याची माहिती पालिका सुत्रांनी दिली.
कोल्हापूर महानगरपालिका हद्दीत जिल्ह्याच्या तुलनेत कोरोना रुग्णांची संख्या पहिल्यापासूनच मोठी आहे. आतापर्यंत १६ हजार ६१२ कोरोना रुग्णांची नोंद झाली आहे तर मृतांची संख्या ३९६वर जाऊन पोहोचली आहे. गेल्या चोवीस तासात ७७ नवीन रुग्णांची नोंद झाली तर तीन रुग्णांचा मृत्यू झाला. रविवार पेठेतील ७५ वर्षीय पुरुष, साळोखे नगरातील ४८ वर्षीय पुरुष तर मंगळवारपेठेतील ६१ वर्षीय पुरुषाचा त्यामध्ये समावेश आहे.
कोल्हापूर शहरातील सात ठिकाणे हॉटस्पॉट ठरु शकतात, त्यामुळे विशेष काळजी घ्यावी, अशी सूचना केंद्र सरकारकडून प्राप्त झाली आहे. त्यामुळे पालिका प्रशासन सतर्क झाले आहे. शहरात विनामास्क फिरणाऱ्यांवर तसेच रात्री आठनंतर गर्दी करणाऱ्या हॉटेल, बार व परमिट रुम, व्यापारी आस्थापना यांच्यावर कारवाई केली जात आहे.
प्रतिबंधात्मक उपाययोजना करण्याबरोबरच लसीकरणाची मोहीमही शहरात सुरु झाली असून, त्याला नागरिकांचा चांगला प्रतिसाद मिळत आहे. शनिवारी एका दिवसात ३,३३५ व्यक्तींनी केंद्रावर जाऊन लस घेतली. आतापर्यंत शहरात ६४ हजार १९९ व्यक्तींना पहिला डोस तर ७,६३९ व्यक्तींना दुसरा डोस देण्यात आल्याची माहिती महापालिका वैद्यकीय अधिकारी डॉ. अमोलकुमार माने यांनी दिली.
लसीकरणाचे आकडे -
- हेल्थकेअर वर्कर - पहिला डोस - ११,८४६, दुसरा डोस - ५८९६
- फ्रंटलाईन वर्कर - पहिला डोस - ६७९२, दुसरा डोस - १५४२
- ४५ ते ५९ वयोगट - पहिला डोस - ३६३, दुसरा डोस - ६२
- ६० वर्षांवरील व्यक्ती - पहिला डोस - ३३,१९८, दुसरा डोस - १३९
- एकूण लसीकरण - ७१ हजार ८३८