Kolhapur: जयसिंगपूरच्या कन्येचा अमेरिकेत डंका, उर्मिला अर्जुनवाडकर यांची उपमहापौरपदी फेरनिवड

अमेरिकेसारख्या प्रगत राष्ट्रामध्ये स्थानिक स्वराज्य संस्थेच्या महत्त्वाच्या पदावर एका मराठी महिलेची निवड होणे ही अभिमानाची गोष्ट

संदीप बावचे

जयसिंगपूर: शिक्षणाचे माहेरघर असलेल्या जयसिंगपूरच्या शिरपेचात मानाचा तुरा रोवला आहे. जयसिंगपूरच्या कन्या उर्मिला अशोक पुरंदरे - अर्जुनवाडकर यांची नुकतीच अमेरिकेतील न्यू जर्सी प्रांतातील ‘होपवेल’ टाउनशिपच्या उपनगराध्यक्षपदी निवड झाली. या निवडीमुळे जागतिक स्तरावर जयसिंगपूरचे नाव उजळले आहे.

उर्मिला अर्जुनवाडकर यांचे बालपण आणि शिक्षण जयसिंगपूरमध्ये झाले. शहरातील गल्ली नंबर चारमध्ये वास्तव्यास असलेल्या जनार्दन अर्जुनवाडकर यांच्या त्या कन्या आहेत. उर्मिला या गेल्या २५ वर्षांहून अधिक काळ न्यू जर्सी येथील प्रतिष्ठित औषध कंपनीमध्ये शास्त्रज्ञ म्हणून कार्यरत आहेत. त्यांचे पती डॉ. अशोक विनायक पुरंदरे वैद्यकीय सेवेत आहेत. चार वर्षे नगरसेविका म्हणून त्यांनी काम केले आहे. याआधी २०२४ मध्येही उपनगराध्यक्ष पदाची धुरा सांभाळली होती.
 
चार वर्षांच्या काळात त्यांनी आरोग्य, शाश्वत पर्यावरण विकास व संवर्धन, शहर संरचना या विभागाचे नेतृत्व केले. या कामगिरीमुळे त्यांच्याकडे पुन्हा उपनगराध्यक्ष पदाची धुरा सोपविण्यात आली आहे. अमेरिकेसारख्या प्रगत राष्ट्रामध्ये स्थानिक स्वराज्य संस्थेच्या महत्त्वाच्या पदावर एका मराठी महिलेची निवड होणे ही अभिमानाची गोष्ट आहे.

होपवेल टाउनशिपच्या प्रशासनात आणि विकासकामांत आता जयसिंगपूरच्या कन्येचा शब्द प्रमाण मानला जाणार आहे. त्यांनी आपल्या कष्टाने आणि जिद्दीने अमेरिकेच्या राजकारणात स्वत:चे स्थान निर्माण केले आहे. गेली चार वर्षे या प्रतिष्ठित नगरपालिकेत नगरसेविका म्हणून कार्यरत आहेत.

उर्मिला यांचे योगदान

कोविडनंतरच्या परिस्थितीशी मुकाबला करण्यासाठी उत्कृष्ट योजना व कार्यवाही केली. आरोग्यविषयक जागृतीसाठी देखील त्या सातत्याने प्रयत्नशील असतात. औषध निर्मिती कंपनीत शास्त्रज्ञ असल्याचा फायदा त्यांना व तेथील नागरिकांना झाला आहे. सार्वजनिक वाहतूक व्यवस्था सुधारण्यासाठी त्या आग्रही असतात. होपवेल नगरपरिषदेला त्यांच्या धोरणामुळेच शाश्वत पर्यावरण विकास व संवर्धनासाठी राज्यस्तरीय पुरस्कार मिळालेला आहे. शिवाय नगरसंरचनेमधील योगदानामुळे कोट्यवधी डॉलरची गुंतवणूक नगरपरिषदेत आणण्यात त्यांचा विशेष सहभाग आहे.