कोल्हापुरातील शाहू मिलमध्ये साकारणार टेक्स्टाइल टुरिझम हब, स्मारक; वस्त्रोद्योग मंत्र्यांच्या बैठकीत निर्णय 

महापालिकेला आराखडा करण्याची सूचना

कोल्हापूर : छत्रपती शाहू मिलमध्ये राजर्षी शाहू महाराजांच्या कार्याला, विचारांना साजेसे स्मारक आणि महाराजांच्या नावे टेक्स्टाइल टुरिझम हब (कापड पर्यटन केंद्र) निर्माण करण्यास वस्त्रोद्योग मंत्री संजय सावकारे यांनी गुरुवारी तत्त्वत: मंजुरी दिली. मिलमधील २६ एकरांपैकी ५ एकर जागा वस्त्रोद्योग विभागाला देऊन त्यामध्ये अर्बन हट अंतर्गत कोल्हापुरी चप्पल, साज, कापड उद्योग यांना एकाच छताखाली बाजारपेठ मिळवून दिली जाईल. उर्वरित २१ एकर जागेचा महापालिकेने एजन्सी नेमून आराखडा तयार करावा व त्यासाठी प्रशासनाने निधी खर्च करावा, अशीही सूचना त्यांनी केली.

महाराष्ट्र राज्य वस्त्रोद्योग महामंडळाकडे असलेल्या छत्रपती शाहू मिलच्या जागेवर राजर्षी शाहू महाराजांच्या प्रस्तावित स्मारकासाठी जागेचे हस्तांतरण करण्याबाबत मुंबईत झालेल्या बैठकीत हा निर्णय झाला.

यावेळी पालकमंत्री प्रकाश आबिटकर, राज्य नियोजन मंडळाचे कार्यकारी अध्यक्ष आमदार राजेश क्षीरसागर, आमदार अमल महाडिक, महापालिका आयुक्त के. मंजुलक्ष्मी उपस्थित होत्या. जिल्हाधिकारी अमोल येडगे व्हिडीओ कॉन्फरन्सद्वारे सहभागी झाले. तसेच प्रधान सचिव अनुष्का सिन्हा, नगर विकास विभागाच्या सुशीला पवार, वस्त्रोद्योग महामंडळाचे व्यवस्थापकीय संचालक श्रीकृष्ण पवार, उपसचिव तुषार पवार, वस्त्रोद्योग महामंडळाचे आयुक्त संजय दैने, सामान्य प्रशासन विभागाचे अव्वर सचिव रामदास कोळेकर उपस्थित होते.

पालकमंत्री आबिटकर यांनी स्थानिक पातळीवर प्रकल्प खर्चाला मर्यादा असल्याने नगरविकास विभागाच्या वैशिष्ट्यपूर्ण योजनेंतर्गत मिलचा विकास करावा, असे सांगितले. आमदार राजेश क्षीरसागर यांनी, राजर्षी शाहू महाराज, छत्रपती ताराराणी यांचे स्मारक व संग्रहालय, कापड उद्योगाचा इतिहास, जुनी यंत्रसामग्री, शाहू मिल म्युझियम, टेक्स्टाइल इंजिनिअरिंग कॉलेज, इन्स्टिट्यूट ऑफ फॅशन टेक्नॉलॉजी, फॅब्रिक डिझाइन, सांस्कृतिक कार्यक्रम, चित्रपट महोत्सवांसाठी अत्याधुनिक एक हजार आसन क्षमतेचे ऑडिटोरीयम, संगीत विद्यालय, कोटीतीर्थ तलावाकडील बाजूचे सुशोभीकरण, अम्युझमेंट पार्क करावे अशी सूचना मांडली. आमदार महाडिक यांनी, केंद्र शासनाच्या विविध संस्थांच्या माध्यमातून जागा विकसित करण्यासंदर्भात पत्रव्यवहार सुरू असून, मार्चनंतर आढावा घ्यावा, अशी मागणी केली.

चिमणीचे जतन

मंत्री सावकारे यांनी मिलमधील "चिमणी" कोल्हापूरच्या औद्योगिक क्रांतीची आणि वैभवशाली इतिहासाची एक महत्त्वाची खूण आहे. या चिमणीला कोणताही धक्का न लावता तिचे मूळ स्वरूप जपून संवर्धन करण्याचे, तसेच मिल्समधील कामगार संघटनेच्या घरकुलासाठी २००० मीटर जागा देण्याची सूचना केली.

कृती समितीने वेधले लक्ष

शाहू मिल पुन्हा सुरू करावे या मागणीकडे पुन्हा सरकारचे लक्ष वेधण्यासाठी गुरुवारी कृती समितीने मिलच्या दारात बैठक घेतली. मिलमध्ये सूत गिरणी पुन्हा उभारावी यासाठी निरंतर चळवळ केली जाईल. पुढील टप्प्यात तालमींमध्ये जागरण बैठका, प्रशासनाकडे पाठपुरावा करण्याचा निर्णय घेण्यात आला.