तासगाव पंचायत समिती घेणार प्रज्ञाशोध परीक्षा...

जिल्ह्यातील पहिलाच उपक्रम : शाळांना नमुना पुस्तिकेचे वितरण

तासगाव : स्पर्धा परीक्षांमध्ये ग्रामीण भागातील गरीब परंतु गुणवंत मुले चमकावीत, या हेतूने तासगावच्या पंचायत समितीने ‘तासगाव प्रज्ञाशोध परीक्षा’ हा उपक्रम राबविण्याचा विधायक निर्णय घेतला आहे. पंचायत समितीच्या शिक्षण विभागाने हा आगळावेगळा उपक्रम राबविण्याचा निर्णय घेऊन न थांबता, प्रज्ञाशोध परीक्षेसाठी दर्जेदार पुस्तक छापले आहे. विद्यार्थ्यांत पहिलीपासून स्पर्धा परीक्षांविषयी आवड निर्माण व्हावी, विद्यार्थ्यांना नियमित अभ्यासाची गोडी लागावी, नियमित अभ्यासक्रमाबरोबर स्पर्धा परीक्षांचा अभ्यास करण्याविषयी जाणीव निर्माण व्हावी, यासाठी सध्या पहिल्या टप्प्यात पहिलीच्या वर्गासाठी तासगाव प्रज्ञाशोध परीक्षा अर्थात ‘टी. टी. एस’चा पॅटर्न तयार करण्यात आला आहे.
नियमित अभ्यासक्रमासोबत स्वतंत्रपणे पंचायत समिती स्तरावर अशा पध्दतीने स्पर्धा परीक्षा घेणारी तासगाव पंचायत समिती ही जिल्ह्यातील एकमेव पंचायत समिती ठरली आहे. पंचायत समितीच्या शिक्षण विभागाने जाणीवपूर्वक या उपक्रमात सहभागी होऊन प्रत्यक्षात टी.टी.एस.चा नमुना तयार केला आहे.
खासगी शैक्षणिक संस्था, शाळा, अभ्यास केंद्रे या माध्यमातून सध्या स्पर्धा परीक्षांचे वातावरण निर्माण झाले आहे. चौथीमध्ये शिष्यवृत्ती परीक्षा असतेच. चौथीपासून पुढे वेगवेगळ्या राज्य तसेच राष्ट्रीय पातळीवरील परीक्षा घेतल्या जातात. त्यामुळे निकोप स्पर्धा निर्माण होऊन अशा पध्दतींच्या परीक्षांबाबत पहिलीपासून विद्यार्थ्यांना प्रेरणा मिळणार आहे.
या परीक्षेच्या पार्श्वभूमीवर पहिल्यांदा तालुक्यातील शिक्षकांची कार्यशाळा घेण्यात आली आहे. प्रायोगिक तत्त्वावर तालुक्यातील सर्व शाळांना नमुना पुस्तिका देण्यात आली आहे.
मार्च-एप्रिलमध्ये ऐच्छिक पध्दतीने परीक्षा घेण्यात येणार आहे. पुढील वर्षापासून पहिली व दुसरीसाठीही ही स्पर्धा घेण्यात येणार आहे. पंचायत समितीच्या सभापती हर्षला पाटील, उपसभापती विश्वास पाटील, गटशिक्षणाधिकारी पी. बी. दुर्गुळे, विमल माने, गटसमन्वयक आकाराम पाटील यांनी नुकतेच या पुस्तिकेचे प्रकाशन केले आहे. (वार्ताहर)


या प्रज्ञाशोध परीक्षेच्या पार्श्वभूमीवर प्रथम तालुक्यातील शिक्षकांची कार्यशाळा घेण्यात आली आहे. प्रायोगिक तत्त्वावर तालुक्यातील सर्व शाळांना नमुना पुस्तिका देण्यात आली आहे. मार्च-एप्रिलमध्ये ऐच्छिक पध्दतीने परीक्षा घेण्यात येणार आहे. पुढील वर्षापासून पहिली व दुसरीसाठीही ही स्पर्धा घेण्यात येणार आहे.