रायगडावर कोल्हापुरातील शिवाजी विद्यापीठाच्या विद्यार्थ्यांची स्वच्छता मोहीम, ७५० पोती प्लास्टिक केले गोळा

मंत्री भरत गोगावले यांच्यासह माजी खासदार संभाजीराजे यांनी विद्यार्थ्यांच्या या कार्याचे कौतुक केले

कोल्हापूर : शिवाजी विद्यापीठाच्या राष्ट्रीय सेवा योजना कक्षातर्फे दरवर्षीप्रमाणे यंदाही शिवराज्याभिषेक दिन सोहळ्याच्या निमित्ताने १५० स्वयंसेवकांच्या साथीने रायगडावर स्वच्छता आणि प्लास्टिक मुक्ती मोहीम राबवण्यात आली. या मोहिमेंतर्गत ७५० गोणी प्लास्टिक व अन्य कचरा संकलन करण्यात आले. मंत्री भरत गोगावले यांच्यासह माजी खासदार संभाजीराजे यांनी विद्यार्थ्यांच्या या कार्याचे कौतुक केले.विद्यापीठाच्या वतीने ४ जून ते ८ जून या कालावधीत १५० स्वयंसेवकांसह रायगड परिक्रमेसह किल्ले रायगडाची स्वच्छता मोहीम पार पाडली. या मोहिमेमध्ये पहिल्या दिवशी इतिहास अभ्यासक प्रा. भिकाजी लाड यांनी छत्रपती शिवाजी महाराजांचे व्यवस्थापन कौशल्य याविषयी माहिती दिली. इतिहास अधिविभागाचे प्रमुख डॉ. अवनीश पाटील यांनी शिवाजी महाराजांच्या यशस्वी मोहिमांबद्दल माहिती दिली.शिवराज्याभिषेक दिनाच्या आदल्या दिवशी राष्ट्रीय सेवा योजनेच्या स्वयंसेवकांनी संपूर्ण रायगडाची स्वच्छता केली. ७ जून २०२५ रोजी पुन्हा रायगडावर निर्माण झालेला कचरा तसेच प्लास्टिक संकलित करून ते पुनर्प्रक्रियेसाठी पाठवण्यात आले. या स्वच्छता मोहिमेंतर्गत रायगड किल्ल्यावरील होळीचा माळ ते जगदीशश्वर मंदिर मार्ग, छत्रपती शिवाजी महाराज यांचे समाधीस्थळ परिसर, राजसदर परिसर, बाजारपेठ परिसर तसेच रोपवेपर्यंतच्या रस्त्यावरील साफसफाई आणि महा दरवाजा ते चित्त दरवाजा या गडउतार होण्याच्या पायी मार्गावर स्वयंसेवकांनी स्वच्छता मोहीम राबवली. यामध्ये सुमारे ३०० बॅग प्लास्टिक स्वयंसेवकांनी संकलित केले. राष्ट्रीय सेवा योजनेचे संचालक डॉ. तानाजी चौगले यांच्या नेतृत्वाखाली एनएसएसचे कार्यक्रमाधिकारी डॉ. पी. आर. माळी, डॉ. गोरखनाथ किर्दत, डॉ. सचिन चव्हाण यांनी शिबिराचे संयोजन केले. मोहिमेसाठी कुलगुरू डॉ. डी. टी. शिर्के, प्र-कुलगुरू डॉ. प्रमोद पाटील, कुलसचिव डॉ. व्ही. एन. शिंदे यांचे मार्गदर्शन लाभले.