लोकमत न्यूज नेटवर्क
गारगोटी : ग्रामीण भागामध्ये कोरोनाचे रुग्ण वाढल्याने तालुक्याच्या ठिकाणी असणाऱ्या कोविड केअर सेंटरवर ताण वाढलेला असून शहरातील खासगी रुग्णालयातील बेड कमी पडू लागले आहेत. या पार्श्वभूमीवर भूदरगड तालुक्यातील ग्रामीण भागातील ज्या नागरिकांना सौम्य लक्षणे आहेत. त्यांच्यावर तातडीने उपचार होण्यासाठी तालुक्यातील प्राथमिक आरोग्य केंद्र, लोकप्रतिनिधी व नागरिकांच्या सहकार्याने मडीलगे बुद्रुक, कडगाव, पिंपळगाव, मिणचे या गावात कोविड केअर सेंटर सुरू करण्याच्या सूचना आमदार प्रकाश आबिटकर यांनी कोरोनाच्या पार्श्वभूमीवर आयोजित आढावा बैठकीमध्ये तहसीलदार अश्विनी अडसूळ यांना सूचना दिल्या.
या वेळी आमदार आबिटकर म्हणाले की, राज्यात कोरोनाची तिसरी लाट येण्याची शक्यता वर्तवली जात आहे. सद्य:स्थितीमध्ये तालुकास्तरावर असणाऱ्या कोविड सेंटर्स पूर्ण क्षमतेने भरलेली असून तेथे कार्यरत असणारे डॉक्टर्स, नर्स आदी कर्मचाऱ्यांवर ताण निर्माण झालेला आहे. त्यामुळे कोरोनाची लक्षणे कमी असणाऱ्या रुग्णांवर प्राथमिक आरोग्य केंद्राच्या ठिकाणी कोविड केअर सेंटर तयार करून उपचार केल्यास रुग्ण लवकरात-लवकर बरे होण्यास मदत होणार आहे. त्या अनुषंगाने प्राथमिक आरोग्य केंद्र, लोकप्रतिनिधी व नागरिकांच्या सहकार्याने कडगांव, पिंपळगाव, मिणचे व मडिलगे बुद्रुक येथे कोविड केअर सेंटर सुरू करणेबाबत कार्यवाही करण्यास सांगितले आहे.
यावेळी तहसीलदार अडसूळ म्हणाल्या की, कडगाव, पिंपळगाव, मिणचे व मडिलगे बुद्रुक येथील प्राथमिक आरोग्य केंद्रांचा सर्व्हे करून या ठिकाणी तत्काळ कोविड केअर सेंटर्स करण्याची कार्यवाही करण्यात येईल. यावेळी तालुका आरोग्य अधिकारी डॉ. सचिन येत्नाळकर यांच्यासह अधिकारी उपस्थित होते.
फोटो : आमदार प्रकाश आबिटकर यांचा लावणे.