राज्य बँकेची निवडणूक लांबणीवर

दिवाळीनंतरच शक्य : न्यायालयीन वाद व दुष्काळाचे कारण

विश्वास पाटील -राज्यात दुष्काळाची स्थिती असल्याचे कारण पुढे करून सर्वच सहकारी संस्थांच्या निवडणुका पुढे ढकलण्याचा निर्णय राज्य शासनाने घेतला असल्याने राज्य सहकारी बँकेची निवडणूकही पुढे गेली आहे. या बँकेचा निवडणूक कार्यक्रम दीड महिन्यापूर्वीच मंजुरीसाठी निवडणूक प्राधिकरणाकडे पाठविला आहे. परंतु, न्यायालयीन वाद व आता सरकारची भूमिका, यामुळे ही निवडणूक होऊ शकलेली नाही. या निवडणुका जानेवारीत होण्याची शक्यता सूत्रांनी व्यक्त केली. बँकेवर २०१३ मध्ये प्रशासक नियुक्त केल्याने तिथे आता संचालक मंडळ अस्तित्वात नाही.संचालक मंडळाच्या संख्येबाबत नागपूर खंडपीठात याचिका दाखल झाली आहे. ही निवडणूक ३० जूनपूर्वी जाहीर करण्याचा सहकार निवडणूक प्राधिकरणाचा प्रयत्न होता; परंतु या याचिकेमुळे खो बसला. बँकेच्या संचालक मंडळासंबंधी नागपूर खंडपीठात दाखल याचिकेची सुनावणी २२ जुलैला होती; परंतु त्यादिवशी न्यायाधीश रजेवर असल्याने याचिका सुनावणीसाठी आली नाही. पुढील तारीख दिल्याची माहिती याचिकाकर्ते अरविंद पोरड्डीवार यांनी दिली. प्रत्येक जिल्हा मध्यवर्ती बँकेस राज्य बँकेच्या संचालक मंडळावर प्रतिनिधित्व मिळावे, अशी याचिकाकर्त्यांची मागणी आहे. यासंदर्भात सरकारने म्हणणे मांडावे, असे आदेश न्यायालयाने दिले आहेत.मुदत संपलेल्या जिल्हा मध्यवर्ती बँका व राज्य बँकेची निवडणूकही ३० जूनपूर्वी घेण्याची हमी राज्य शासनाने उच्च न्यायालयात प्रतिज्ञापत्राद्वारे दिली होती. त्यानुसार जिल्हा बँकांच्या निवडणुका झाल्या; परंतु राज्य बँकेची निवडणूक मतदारयादी पूर्ण होऊनही लटकली. सहकार निवडणूक प्राधिकरणाने निवडणूक अधिकारी म्हणून विभागीय सहनिबंधक विकास रसाळ यांची नियुक्तीही केली आहे. पूर्वी बँकेचे संचालक मंडळ ४८ जणांचे होते; परंतु नव्या सहकार कायद्यानुसार ही संख्या २१ पर्यंतच मर्यादित केली. त्याला पोरड्डीवार यांनी गडचिरोली जिल्हा बँकेचे संचालक जागोबा खेडकरेंमार्फत नागपूर खंडपीठात आव्हान दिले. संचालक मंडळाची संख्या वाढविण्याची मागणी ही पोटनियमाला नव्हे, तर थेट महाराष्ट्र सहकारी संस्था अधिनियम १९६० च्या ९७ व्या घटनादुरुस्तीस आव्हान देणारी आहे. अद्याप आदेश नाहीदुष्काळामुळे सहकारी संस्थांच्या निवडणुका पुढे ढकलण्याचा शासनाचा विचार असल्याचे सांगण्यात येते; परंतु तसा कोणताही आदेश आमच्याकडे या क्षणापर्यंत आलेला नाही, असे सहकार निवडणूक प्राधिकरणाच्या अधिकृत सूत्रांनी स्पष्ट केले.अंतिम मतदार यादी १३ मे २०१५ रोजी प्रसिद्धएकूण मतदार : २०८२पात्र मतदार : १३६९