‘पंचगंगे’च्या सत्तेसाठी आज मतदान

उद्या मतमोजणी : पाटील गटाचे आठजण बिनविरोध; निवडणुकीकडे जिल्ह्याचे लक्ष

इचलकरंजी : कोल्हापूर जिल्ह्यातील तीन तालुके आणि बेळगाव जिल्ह्यातील दोन तालुक्यांत १८ हजार सभासद असलेल्या पंचगंगा सहकारी साखर कारखान्याच्या संचालक मंडळासाठी उद्या, शनिवारी निवडणुकीचे मतदान होत आहे. जिल्ह्यातील सर्वांत जुन्या आणि स्वातंत्र्यसेनानी रत्नाप्पाण्णा कुंभार संस्थापक-अध्यक्ष असलेल्या कारखान्याच्या निवडणुकीकडे जिल्ह्याचे लक्ष लागून राहिले आहे.साधारणत: ५५ वर्षांपूर्वी पंचगंगा साखर कारखान्याची स्थापना झाली. संस्थापक रत्नाप्पाण्णा कुंभार हयात असेपर्यंत कारखान्यावर असलेले त्यांचे वर्चस्व, शिरोळ तालुक्यात ५० शेती सिंचन योजनांद्वारे ऊस पिकामुळे हजारो शेतकऱ्यांचे झालेले कल्याण, रत्नाप्पाण्णांचे मंत्रिपद, जिल्ह्याचे राजकीय केंद्र, कुंभार-यड्रावकर संघर्ष, अशा अनेक घडामोडींमुळे ‘पंचगंगा’ नेहमीच प्रसिद्धीच्या वलयात राहिला. मात्र, रत्नाप्पाण्णांच्या अखेरच्या काळात बदललेली राजकीय स्थिती आणि अर्थकारण यामुळे कारखान्याची स्थिती नाजूक झाली. त्यांच्या पश्चात त्यांच्या कन्या रजनीताई मगदूम अध्यक्ष असताना ती आणखीन खालावली. त्यानंतर पी. एम. पाटील व त्यांच्या सहकारी संचालकांनी कारखाना सावरायचा प्रयत्न केला.परंतु, सन २००८ मध्ये पंचगंगा कारखान्याला असलेली कोट्यवधी रुपयांची विविध देणी पाहता पाटील व त्यांच्या सहकाऱ्यांना कारखाना ‘बीओटी’ तत्त्वावर भाड्याने देण्याशिवाय अन्य पर्याय उरला नाही. अगदी पी. एम. पाटील यांच्या भाषेत, सभासदांचे मालकत्व आणि रत्नाप्पाण्णा कुंभार यांचे अस्तित्व राहण्यासाठी ‘पंचगंगा’ १८ वर्षे भाडेकराराने ‘रेणुका शुगर्स’ला देण्यात आला. कारखाना भाडेतत्त्वावर दिल्यानंतर आता पहिलीच निवडणूक होत आहे. ‘पंचगंगा’च्या संचालकांच्या १४ जागांसाठी विद्यमान अध्यक्ष पाटील पॅनेलचे सर्व १४ आणि विरोधी मगदूम पॅनेलचे सहा उमेदवार निवडणूक रिंगणात आहेत. ‘ब’ वर्ग संस्था गटात पाटील पॅनेलचे दिलीप महाजन बिनविरोध निवडले गेले आहेत. उर्वरित १३ जागांसाठी मगदूम गटाचे सहाच उमेदवार असल्याने पाटील गटाचे सातजण निवडून आले आहेत, असे मानले जाते. उर्वरित सात जागांसाठी उद्या मतदान होत आहे. मतमोजणी व निकाल रविवारी (दि. २५) आहे. (प्रतिनिधी)