कोरोनाशी लढणारे सीपीआरमधील कर्मचारीच लसीकरणात मागे

समीर देशपांडे : लोकमत न्यूज नेटवर्क

कोल्हापूर : कोरोनाच्या काळामध्ये जिवावर उदार होऊन पाॅझिटिव्ह रुग्णांना बरे करणारे येथील सीपीआर रुग्णालयातील कर्मचारीच लस घेण्यामध्ये मात्र जिल्ह्यात सर्वांत मागे आहेत. ग्रामीण जिल्ह्यामध्ये सरासरी ६१ टक्के लसीकरण झाले असताना सीपीआरमध्ये मात्र केवळ २१ टक्के लसीकरण झाले आहे.

जिल्ह्यात १६ जानेवारीपासून ११ आरोग्य संस्थांच्या ठिकाणी लसीकरण सुरू करण्यात आले. यानंतर आणखी ८ आरोग्य संस्थांमध्ये लसीकरणाची सोय करण्यात आली आणि आता त्यानुसार नवे नियोजन करण्यात आले आहे.

चौकट

कोल्हापूर जिल्हा लसीकरण एकूण उद्दिष्ट ३३८७७

आतापर्यंत ७ फेऱ्यांमधील उद्दिष्ट ९५००

आतापर्यंत ७ फेऱ्यांमधील लसीकरण ५७९०

यातील महापालिकेचे लसीकरण २५७६

जिल्ह्यातील लसीकरण ३२१४

आतापर्यंत लसीकरण झालेली टक्केवारी ६१ टक्के

चौकट

सीपीआरमध्ये सर्वांत कमी लसीकरण

सीपीआरचे होते उद्दिष्ट ७००

आतापर्यंत लस घेतलेले १४६

लस घेतलेल्यांची टक्केवारी २१ टक्के

कोट

१ मला गेले काही दिवस कमी प्रमाणात ताप जाणवत होता. त्यामुळे मी आतापर्यंत लस घेतलेली नाही. मात्र, एकदा का ताप कमी झाला की मी लस घेणार आहे.

जि. प.कडील वैद्यकीय अधिकारी

२ मला चार ड्रग्जची ॲलर्जी आहे. त्यामुळे मी याबाबत वरिष्ठांना कल्पना दिली आहे. त्यांनीही दुसऱ्या टप्प्यात लस टोचून घेण्याची सूचना केली आहे.

बहुउद्देशीय आरोग्य कर्मचारी, हातकणंगले

३ मला २५ जानेवारी रोजी लस घेण्यासाठी विभागाकडून संदेश आला होता; परंतु सकाळी मला कणकण आल्याने मी लस घेतलेली नाही. पुढील आठवड्यात लस घेणार आहे.

आशा कर्मचारी, करवीर तालुका

४ माझ्या वरिष्ठ डॉक्टरांनीही लस घेतली आहे; परंतु माझी मुळातच तब्येत अशक्त असल्याने मला लस घेण्यासाठी भीती वाटत आहे.

परिचारिका, शिरोळ तालुका

५ सध्या सुरू असलेल्या लसीकरणाचा दुसरा टप्पा संपल्यानंतर २८ दिवसांनी मी लस टोचून घेण्याचा निर्णय घेतला आहे. याबाबतीत दक्षता घेऊन, थोडे थांबून लस घेणार आहे.

आरोग्य कर्मचारी, सीपीआर कोल्हापूर

कोट

जिल्ह्यामध्ये लसीकरणाचे काम चांगल्या पद्धतीने चालले आहे. काही ठिकाणी संख्या कमी आहे. मात्र, ज्या ठिकाणी लसीकरण कमी झाले आहे, त्या ठिकाणी समुपदेशन सुरू आहे. वैद्यकीय अधिकाऱ्यांनीच आधी लसीकरण करून घ्यावे, असे आवाहन करण्यात आले आहे.

डॉ. योगेश साळे, जिल्हा आरोग्य अधिकारी, जिल्हा परिषद कोल्हापूर