इचलकरंजी : कोरोनाच्या पार्श्वभूमीवर शहरात विनामास्क फिरणाऱ्यांवर पोलीस व नगर परिषदेच्या संयुक्त पथकाद्वारे कारवाई केली जात आहे. त्यामध्ये शनिवारी बाहेरगावाहून कारमधून शहरात प्रवेश करणाऱ्या दोघांना अडवून वाहतूक पोलिसांनी मास्क न वापरल्याप्रकरणी १०० रुपयांचा दंड केला. त्यामध्ये एक जण न्यायाधीश होते. तरीही त्यांनी नियम मोडल्याबद्दल दंड दिला, अशी माहिती वाहतूक शाखेचे प्रमुख विकास अडसुळ यांनी दिली.
कोल्हापूर नाका येथे कोरोनाच्या पार्श्वभूमीवर शनिवारी दिवसभर कारवाई सुरू होती. दुचाकीसह सर्वच वाहनांची तपासणी केली जात होती. याच दरम्यान कोल्हापूरकडून इचलकरंजी शहरात प्रवेश करत असलेली चारचाकी गाडी अडविण्यात आली. त्यामधील दोघा व्यक्तींनीही मास्क न वापरल्याचे आढळल्याने वाहतूक शाखेच्या पोलिसाने त्यांच्यावर दंडात्मक कारवाई केली; मात्र कारवाईनंतर त्यातील एक जण न्यायाधीश असल्याचे समजले.