शिरोळ : तालुक्यातील ज्या लाभार्थ्यांना जागा उपलब्ध नाही मात्र ते घरकुलासाठी पात्र आहेत, अशा लाभार्थ्यांना ग्रामपंचायतीने जागा उपलब्ध करून देण्याबाबत पुढाकार घ्यावा. आपले स्वत:चे घर असावे असे सर्वांचेच स्वप्न असते. ते घरकुल योजनेतून देण्यासाठी प्रयत्न झाले पाहिजेत, असे प्रतिपादन आरोग्य राज्यमंत्री डॉ. राजेंद्र पाटील-यड्रावकर यांनी केले.
शिरोळ तालुका पंचायत समितीच्यावतीने महाआवास अभियान अंतर्गत तालुकास्तरीय कार्यशाळा पार पडली. मंत्री यड्रावकर म्हणाले, सध्या तालुक्यातील ‘ड’ यादीतील असणाऱ्या लाभार्थ्यांना अजूनही घरकुल मंजूर झालेले नाही. या लोकांची घरे मंजूर करण्यासाठी शासनस्तरावर प्रयत्न करणार असल्याचे त्यांनी सांगितले.
प्रास्ताविक गटविकास अधिकारी शंकर कवितके यांनी केले. मल्लाप्पा चौगुले यांनी मनोगत व्यक्त केले. कार्यक्रमास पं. स. सभापती कविता चौगुले, रूपाली मगदूम, मीनाज जमादार, दीपाली परीट, बाबासोा पाटील, डॉ. प्रसाद दातार, रवी कांबळे यांच्यासह मान्यवर उपस्थित होते. शिक्षण विस्तार अधिकारी रत्नप्रभा दबडे यांनी सूत्रसंचालन केले. सहाय्यक गटविकास अधिकारी सुनील रूपनवर यांनी आभार मानले.