दादांच्या ‘व्यूहरचने’कडे गडहिंग्लजकरांचे ‘लक्ष’!

गडहिंग्लज पालिका निवडणूक : ‘शहापूरकर-चव्हाणां’च्या प्रवेशानंतरच हालचालींना गती

राम मगदूम - गडहिंग्लज --पालकमंत्री चंद्रकांतदादा पाटील गडहिंग्लज नगरपालिकेच्या निवडणुकीसाठी कोण-कोणती व्यूहरचना आखतात, याकडेच राजकीय जाणकारांसह गडहिंग्लजमधील नागरिकांचे लक्ष लागले आहे.आमदार हसन मुश्रीफ यांच्या गडहिंग्लज साखर कारखान्यावरील वर्चस्वाला धक्का देण्याचा जोरदार प्रयत्न चंद्रकांतदादांनी कारखान्याच्या निवडणुकीत केला. त्यासाठी त्यांनी जनता दलाचे ज्येष्ठ नेते अ‍ॅड. श्रीपतराव शिंदे आणि डॉ. प्रकाश शहापूरकर या कारखान्याच्या दोन्ही माजी अध्यक्षांना एकत्र आणण्याचा प्रयत्न केला. मात्र, त्यास यश आले नाही. त्यानंतर शिंदे-मुश्रीफ व शहापूरकर-चव्हाणांची युती झाली. त्याचवेळी त्यांनी ‘शहापूरकर-चव्हाण’ या जोडगोळीला ‘भाजप’मध्ये घेण्याचे ठरविले होते.दरम्यान, आठवड्यापूर्वी शहापूरकर व चव्हाण या दोघांनीही खास पत्रकार परिषद घेवून गडहिंग्लज शहर व तालुक्यातील प्रलंबित प्रश्नांच्या सोडवणुकीसह तालुक्याच्या सर्वांगीण विकासासाठी ‘भाजप’मध्ये प्रवेश करीत असल्याची घोषणा केली. रविवार (दि. ११) रोजी होणाऱ्या पक्षप्रवेश व शक्तीप्रदर्शनाची दोघांनीही जोरदार तयारी सुरू केली आहे. त्यानंतरच खऱ्या राजकीय हालचालींना वेग येणार आहे. त्यामुळेच त्यांच्यासोबत कुणा-कुणाचा प्रवेश होतो, याकडेच शहरासह जिल्ह्याचेही लक्ष लागले आहे. चव्हाण-शहापूरकर कुठे होते ?नगरपालिकेच्या गतवेळच्या निवडणुकीत तत्कालीन सत्ताधारी ‘जनता दल-जनसुराज्य’ आघाडीचे नेते शिंदे व चव्हाणांच्या पराभवासाठी राष्ट्रवादीचे नेते बाबासाहेब कुपेकर व मुश्रीफ यांनी पक्षाच्या चिन्हावर राष्ट्रवादीचे पॅनेल ताकदीने रिंगणात उतरविले होते. त्यावेळी शहापूरकरदेखील कुपेकर व मुश्रीफ यांच्यासोबत होते.गतवेळी काय-काय झालं?जागा वाटप आणि उमेदवारीच्या नावावरून गतवेळी जनता दल आणि जनसुराज्य यांच्यात मतभेद झाले. त्यामुळे दोन्ही बाजूने बंडखोरी झाली होती. ११ जागा लढविलेल्या जनता दलाला ७ जागा, तर ८ जागा लढविलेल्या जनसुराज्यला केवळ १ जागा मिळाली. १७ जागा लढविलेल्या राष्ट्रवादीला ९ जागा मिळाल्या. एकमेव निवडून आलेले ‘जनसुराज्य’चे नगरसेवक नरेंद्र भद्रापूर सुरुवातीला राष्ट्रवादीबरोबर आणि त्यानंतर व आता जनता दलासोबत आहेत. शहापूरकर समर्थक प्रा. रमेश पाटील व दीपा बरगे हे दोघेही राष्ट्रवादीच्या पॅनेलमधून ‘घड्याळ’ चिन्हावर लढले. पराभूत झालेल्या प्रा. पाटील यांची शहर राष्ट्रवादीच्या कार्याध्यक्षपदी नियुक्ती झाली, तर विजयी झालेल्या बरगे या ५ वर्षे राष्ट्रवादीसोबत राहिल्या.महालक्ष्मी यात्रा समितीकडेही लक्ष‘जनसुराज्य’चे माजी उपनगराध्यक्ष रमेश रिंगणे व प्रेमा विटेकरी, माजी नगरसेवक चंद्रकांत सावंत या महालक्ष्मी यात्रा समितीच्या तीनही प्रमुख पदाधिकाऱ्यांनीदेखील अलीकडेच भाजपमध्ये प्रवेश केला आहे. त्यामुळे त्यांचे यात्रा समितीमधील अन्य सहकारी पालिकेच्या निवडणुकीत कोणती भूमिका घेणार याकडेही शहराचे लक्ष लागले आहे.