Kolhapur: अग्नितांडवाने आजरा शहर हादरले; आठ दुकानगाळे, नऊ वाहनांसह साहित्य जळून खाक 

प्राथमिक अंदाजानुसार ४ कोटींचे नुकसान

आजरा : मध्यरात्री लागलेल्या अग्नितांडवाने आजरा शहर हादरले. या आगीत ८ दुकानगाळे व चारचाकी दुरुस्तीच्या गॅरेजमधील ९ वाहनांसह साहित्य जळून खाक झाले. प्राथमिक अंदाजानुसार ४ कोटी रुपयांचे नुकसान झाले. सुदैवाने कोणतीही जिवीतहानी झालेली नाही.

आगीत प्लंबिंग साहित्याचे अरकाम ट्रेडर्स, ऑईल,मशीन टूल्स व दुचाकीचे मटेरियल विक्रीचे शहाबाद ऑटो गॅरेज, रेड ड्रॅगन चायनीज सेंटर, मनाली एग्ज सेंटर, मंतेशा टायर्स, संतोष बॅटरीज, दळवी इलेक्ट्रिकल्स, पंचतारा हॉटेल व भाई भाई कोल्ड्रिंक्स, चार चाकी दुरुस्तीचे कारझोन सेंटरमधील ९ चारचाकी, कलर मशीन, कार रिपेअर मशीन, एअर कॉम्प्रेसर, स्पेअरपार्ट जळून खाक झाले आहेत. 

सकाळपर्यंत आग विझवण्याचे सुरु होते काम

मध्यरात्री लागलेली आग सकाळी ८ वाजेपर्यंत विझविण्याचे काम सुरू होते. आगीचे नेमके कारण समजू शकले नाही. मात्र प्राथमिक अंदाजानुसार शॉर्टसर्किटने आग लागल्याचे समजते. दुकानगाळ्यांना लागलेली आग पाहण्यासाठी नागरिकांनी गर्दी केली होती.