नऊ कोटींच्या बनावट टीडीआरप्रकरणी गुन्हा

महापालिका वर्तुळात खळबळ : सानेगुरुजी वसाहतीतील क्रीडांगणाची जागा

कोल्हापूर : सानेगुरुजी वसाहत परिसरातील आरक्षित क्रीडांगणाची दोन एकर जागा दाखवून पाच एकरांचा टीडीआर (हस्तांतर विकसन हक्क) घेतल्याप्रकरणी राजारामपुरी पोलिसांत शुक्रवारी रात्री उशिरा धैर्यशील पांडुरंग यादव (रा. एमएलजी शाळेजवळ, भवानी मंडप) या संशयितावर गुन्हा दाखल झाला. संशयित यादवने कोल्हापूर महापालिकेला खोटी माहिती सादर केली. याबाबतची फिर्याद नगररचना विभागाचे कनिष्ठ अभियंता अरुणकुमार दत्तात्रय गवळी (रा. प्लॉट नंबर १०, मधुमालती अपार्टमेंट, शुगरमिल) यांनी दिली. दरम्यान, सध्याच्या बाजारभावानुसार या जागेची किंमत सुमारे नऊ कोटी रुपये होते.याबाबत पोलिसांनी सांगितले की, सानेगुरुजी वसाहत परिसरातील रि.स.नं. १०१०/१ पैकी क्रीडांगणासाठी आरक्षण क्रमांक २९३ आहे. या जागेचे वटमुखत्यारधारक संशयित धैर्यशील यादव आहे. यादवने ही जागा नऊ हजार ९०० चौरस मीटर असताना ती एक लाख ९० हजार ६० चौरस मीटर आहे, अशी खोटी माहिती महापालिकेच्या नगररचना विभागाला सादर केली. दरम्यान, दोन-तीन वर्षांपूर्वी जादा टीडीआर दिल्याचे नगरसेवक भूपाल शेटे यांनी पत्रकार परिषद घेऊन पर्दाफाश केल्यानंतर महापालिका वर्तुळात खळबळ उडाली होती. शेटे यांनी याबाबतची संपूर्ण माहिती तत्कालीन आयुक्त विजयालक्ष्मी बिदरी यांना दिली होती. चार महिन्यांपूर्वी बिदरी यांची बदली झाली. राजारामपुरी येथील नगररचना विभागाचे कनिष्ठ अभियंता अरुणकुमार गवळी यांनी तपास केला असता संशयित यादवने खोटी माहिती सादर करून जास्त टीडीआर घेतल्याचे निष्पन्न झाले. त्यानंतर शुक्रवारी रात्री संशयित धैर्यशील यादव याच्याविरोधात फिर्याद दिली. त्यानुसार यादवविरोधात भारतीय दंडविधान संहिता ‘कलम १७६’ कलमानुसार गुन्हा दाखल केला. यादव हा बिल्डर असल्याचे समजते. या प्रकरणाचा तपास पोलीस निरीक्षक अमृत देशमुख करत आहेत. (प्रतिनिधी)जादा टीडीआर रद्दप्रत्यक्षात दोन एकरांचा टीडीआर द्यायचे बंधनकारक असताना तो पाच एकरांचा दिल्याचे कोल्हापूर महापालिकेच्या तत्कालीन आयुक्त विजयालक्ष्मी बिदरी लक्षात येताच त्यांनी हा टीडीआरच रद्द केला.तीन वर्षांपूर्वी सानेगुरुजी वसाहतीतील आरक्षित क्रीडांगणाची माहिती प्रसारमाध्यमांना दिली होती. खऱ्या अर्थाने गुन्हा दाखल झाल्याने यश आले.- भूपाल शेटे, नगरसेवक, कोल्हापूर महापालिका.