Kolhapur: जोतिबा भाविकांवर मधमाश्यांचा हल्ला, पाच जण जखमी 

एकाची प्रकृती गंभीर

कोडोली : जोतिबा देवदर्शनासाठी दुचाकी वाहनावरून चाललेल्या भाविकांवर कोडोली-गिरोली मार्गावर अचानक आलेल्या मधमाश्यांनी पाच जणांवर हल्ला करून जखमी केले. ही घटना रविवारी सकाळी दहाच्या सुमारास घडली. या घटनेत दुचाकीवरून प्रवास करणाऱ्या दोन महिलांसह पाच जण जखमी झाल्याने परिसरात खळबळ उडाली. ओम राजेंद्र गुरव (रा. कोल्हापूर) यांना मोठ्या प्रमाणावर चावल्याने त्यांची प्रकृती गंभीर असल्याने त्यांना उपचारासाठी जिल्हा रुग्णालयात दाखल केले आहे.

याबाबतची माहिती अशी, धनाजी खोंद्रे, अनिता खोंद्रे, श्रेया खोंद्रे (रा. जाखले) तसेच रोहित कांबळे (रा. केखले) हे या मार्गावरून जात असताना त्यांनाही मधमाश्यांनी हल्ला करून जखमी केले. मधमाश्यांनी अचानक हल्ला केल्याने हे सर्वजण रस्त्याच्या कडेला पडले. यावेळी अन्य प्रवाशांनी त्यांना वाचविण्याचा प्रयत्न करून रुग्णवाहिकेच्या मदतीने कोडोली उपजिल्हा रुग्णालयात दाखल केले. 

या परिसरात वाळलेले गवत पेटविल्याने मधमाश्यांच्या पोळ्यास आगीची झळ लागल्याने मधमाश्यांनी रौद्ररूप धारण करून नागरिकांवर हल्ला केला असण्याची शक्यता वर्तविण्यात येत आहे. डोंगर पेटविला जात असल्याने अशा घटना पुन्हा घडू शकतात, त्यामुळे नागरिकांनी घाटातून प्रवास करताना सतर्क राहण्याचे आवाहन करण्यात आले आहे.