Kolhapur ZP Election 2026: जिल्हा परिषदेसाठी ९०७, पंचायत समितीसाठी १५३० उमेदवारी अर्ज, माघारीची मुदत मंगळवारपर्यंत

उमेदवारीसह चिन्ह पोहोचवण्यासाठी धडपड करावी लागणार

कोल्हापूर : कोल्हापूर जिल्हा परिषदेच्या निवडणुकीसाठी बुधवारी अर्ज भरण्याची शेवटची मुदत असल्याने शक्तिप्रदर्शन करत ४६० उमेदवारांनी ५९८ अर्ज दाखल केले. बारा पंचायत समितीतील जागांसाठी ९८५ उमेदवारांनी ११५९ अर्ज दाखल केले. अर्ज भरण्याच्या दिवसाखेर जिल्हा परिषदेसाठी ७०३ उमेदवारांचे ९०७ अर्ज तर पंचायत समितीसाठी १२८९ उमेदवारांनी १५३० अर्ज दाखल केले.

अर्जांची छाननी उद्या गुरुवारी असून माघारीची मुदत मंगळवारपर्यंत आहे. त्याचदिवशी चिन्हे वाटप आहेत. ५ फेब्रुवारीस मतदान तर ७ ला मतमोजणी होत आहे. अर्ज दाखल करण्याच्या प्रक्रियेचा पहिला टप्पा पूर्ण झाला.

जिल्हा परिषदेच्या ६८ जागांसाठी ही लढत होत आहे. जागा आणि दाखल अर्जांचा विचार करता जिल्हा परिषदेला एका जागेसाठी सरासरी ५ अर्ज दाखल झाले आहेत. त्यातील माघार किती घेतात, यावरच लढत किती रंगी होणार आहे, हे ठरणार आहे. राजकीय पक्षाकडून, उमेदवाराकडून मंगळवारपर्यंत माघारीसाठी जोरदार फिल्डिंग लावली जाऊ शकते. काही डमी अर्जही मागे घेतले जातात. काहीचे अर्ज छाननीत निकाली निघतात. नगरपालिका, महापालिकांच्या पाठोपाठ जिल्हा परिषदेलाही तितकीच चुरस असल्याचे अर्ज संख्येवरून दिसत आहे.

ज्यांना पक्षाची उमेदवारी मिळाली आहे, ते आज गुरुवारपासून प्रचारासाठी बाहेर पडण्यास मोकळे झाले. अनेकांनी व्यक्तिगत प्रचारही सुरू केला आहे. पण आता उमेदवारीसह चिन्ह पोहोचवण्यासाठी धडपड करावी लागणार आहे. कालपर्यंत एका पक्षात होते, ते आज अर्ज दाखल करताना दुसऱ्याच पक्षात गेले आहेत. त्यामुळे अशांना बदललेले चिन्ह घरोघरी नेण्यासाठी चांगलीच कसरत करावी लागणार आहे.

तालुकानिहाय दाखल अर्जांची बुधवार अखेर माहिती :

तालुका : जिल्हा परिषद : पंचायत समिती
शाहूवाडी : २४ : ४२
पन्हाळा : ८४ : १०३
शिरोळ : १०२ : १२६
करवीर : १७९ : २३४
गगनबावडा : १२ : १९
राधानगरी : १०७ : २०३
कागल : ६७ : १६६
भुदरगड : ५४ : १३६
आजरा : २१ : ४१
गडहिंग्लज : ७५ : १४१
चंदगड : ४४ : १२२
हातकणंगले : १३७ : १९८
एकूण : ९०७ : १५३०