आजरा तालुक्यात चार प्राथमिक आरोग्य केंद्र, एक ग्रामीण रुग्णालय व २७ उपकेंद्रामधून कोरोनाची लस देण्याचे काम आरोग्य विभागामार्फत युद्धपातळीवर सुरू आहे. नागरिकांनीही यासाठी प्रतिसाद देण्याची गरज आहे. कोरोनाची तिसरी लाट येण्यापूर्वी लसीकरण पूर्ण झाल्यास धोका टाळता येऊ शकतो. सलग दोन वर्षे सर्व व्यवहार कोरोनामुळे ठप्प झाले आहेत. कोरोनापासून बचाव करण्यासाठी नागरिकांनी सतर्क राहून कोरोनाची लस घ्यावी, असेही आवाहन आरोग्य विभागामार्फत करण्यात आले आहे. आजरा शहरात प्रत्येक प्रभाग व गल्लीनिहाय कोरोनाची लस देण्याचे काम सुरू आहे. आजरा तालुक्यात १८ ते ४५ वयोगटांतील कोरोनाचा पहिला डोस घेतलेले २५,१८९, तर दुसरा डोस २६८३ जणांनी घेतला आहे. ४५ ते ६० वयोगटांतील १८४९८ नागरिकांनी पहिला डोस, तर १५५२८ नागरिकांनी दुसरा डोस घेतला आहे.
६० वर्षांवरील जवळपास ३७ हजार लोकांनी कोरोनाचे दोन्ही डोस घेतले आहेत. तालुक्यात पहिला डोस घेतलेले ६५ हजार, तर दुसरा डोस घेतलेले ३४ असे एकूण ९९ हजार नागरिकांनी कोरोनाची लस घेतली आहे.
कोरोनाची पहिल्या वर्षी १००४, तर चालूवर्षी ४२८३ लोकांना कोरोनाची लागण झाली. कोरोना पॉझिटिव्ह ५२८७ पैकी १३६ लोकांचा मृत्यू झाला आहे. ५१५१ नागरिकांवर वेळेत उपचार झाल्याने ते बरे होऊन घरी परतले. सध्या कोरोनाबाबत नागरिकांच्या मनात भीती राहिली नाही. मात्र, कोरोनाचे रुग्ण अद्यापही सापडत आहेतच.
.. दोन वर्षांत कोरोनाने १३६ जणांचा मृत्यू
कोरोनाने गेल्या वर्षात ४८ जणांचा, तर चालू वर्षात ८८ जणांचा असे एकूण १३६ जणांचा मृत्यू झाला आहे. कोरोनामुळे अनेक कुटुंबातील प्रमुख व्यक्तींचा मृत्यू झाल्यामुळे ही कुटुंबे कोरोनातून सावरलेली नाहीत. तालुक्यात अध्यापही कोरोनाचे सावट आहेच.