जावयाने गुंड आणून सासू सासऱ्याची केली पिटाई, गुन्हा दाखल

शनिवारी समाधान हा त्याच्या आई सोबत सासरी गावडे यांच्याकडे आला. तेंव्हा त्यांच्यात कडाक्याचे भांडण झाले.

उल्हासनगर : कॅम्प नं-४, भारतनगर येथे राहणाऱ्या सासू, सासरे व साल्याची गुंड आणून पिटाई केल्याचा प्रकार शनिवारी दुपारी उघड झाला. याप्रकरणी विठ्ठलवाडी पोलीस ठाण्यात जावाई समाधान अनिल बाविस्कर यांच्यासह ७ जणावर गुन्हा दाखल केला आहे.

 उल्हासनगर भारतनगर मध्ये राहणारे चिदानंद योगसिद्ध गावडे यांच्या मुलीचा विवाह समाधान अनिल बाविस्कर या तरुणा सोबत काही महिन्यापूर्वी झाला. समाधान याचे पत्नी सोबत भांडण झाल्याने, ती भारतनगर येथे आई-वडिलांकडे आली. शनिवारी समाधान हा त्याच्या आई सोबत सासरी गावडे यांच्याकडे आला. तेंव्हा त्यांच्यात कडाक्याचे भांडण झाले. या भांडणाची तक्रार देण्यासाठी गावडे यांच्या पत्नी रेखा विठ्ठलवाडी पोलीस ठाण्याला गेल्या होत्या. मात्र पोलिसांनी त्यांची तक्रार घेतली नाही. असे त्यांचे म्हणणे आहे. पोलीस ठाण्यात तक्रार करतात, या रागातून समाधान बाविस्कर या जावयाने काही गुंड आणून सासू, सासरे व साला रोहित यांना शनिवारी दुपारी लोखंडी रॉड, लाकडी दांडके आदीने जबर मारहाण केली. 

चिदानंद गावडे, रेखा गावडे व रोहित गावडे हे मारहाणीत गंभीर जखमी झाले असून त्यांच्यावर मध्यवर्ती रुग्णालयात उपचार सुरु आहे. तक्रार घेऊन गेलेल्या रेखा गावडे यांच्या तक्रारीची पोलिसांनी वेळीच दखल घेतली असतीतर, जावई समाधान बाविस्कर याने गुंडाच्या मदतीने हल्लाच केला नसता. असे गावडे कुटुंबासह नातेवाईक व परिसरातील नागरिकांचे म्हणणे आहे. मारहाणीत जखमी झाल्यावर विठ्ठलवाडी पोलिसांनी जावाई समाधान अनिल बाविस्कर, सागर इंगळे यांच्यासह ७ जणावर गुन्हा दाखल केला. अधिक तपास पोलीस करीत आहेत.