आता मासिक पाळी आली तरी विद्यार्थींनीची शाळा बुडणार नाही

या प्रसंगी महापालिका आयुक्त अभिनव गोयल हे देखील उपस्थित होते.

मुरलीधर भवार, कल्याण : कल्याण डाेंबिवली महापालिकेच्या उंबारली येथील उर्दू शाळेत सॅनिटरी नॅपकिन व्हेंडिंग व डिस्पोजल मशीन कार्यान्वीत करण्यात आले आहे. या मशिनचे उद्धाटन महापौर हर्षाली चौथरी थवील यांच्या हस्ते सोमवारी करण्यात आले. या प्रसंगी महापालिका आयुक्त अभिनव गोयल हे देखील उपस्थित होते.

ही मशीन लोकसहभागातून उपलब्ध करुन देण्यात आली आहे. महापालिकेच्या शिक्षण विभागामार्फत विद्यार्थिनींमध्ये मासिक पाळी स्वच्छता व्यवस्थापनाबाबत जागरूकता निर्माण करण्याच्या उद्देशाने ही मशीन कार्यान्वीत केली आहे. या उपक्रमामुळे विद्यार्थिनींना मासिक पाळीदरम्यान आवश्यक सॅनिटरी नॅपकिन सहज उपलब्ध होणार आहेत. त्याची सुरक्षित आणि स्वच्छ विल्हेवाट लावण्याची सोयही शाळेतच उपलब्ध आहे. त्यामुळे विद्यार्थिनींच्या आरोग्य संवर्धनास मदत होणार असून त्यांच्या शिक्षणात कोणताही अडथळा येऊ नये हा या उपक्रमामागील मुख्य उद्देश आहे.

महापाैर हर्षाली यांनी सांगितले की, मासिक पाळी स्वच्छता या विषयाबाबत विद्यार्थिनींमध्ये योग्य जागरूकता निर्माण होणे अत्यंत गरजेचे आहे. यासाठी शाळेतील शिक्षकांनी विद्यार्थिनीं बरोबरच त्यांच्या पालकांचेही समुपदेशन करणे आवश्यक असून या विषयाबाबत समाजात सकारात्मक दृष्टीकोन निर्माण होणे गरजेचे आहे. आयुक्त गाेयल म्हणाले की, मुलींच्या शिक्षणामध्ये मासिक पाळीमुळे कोणतीही अडचण निर्माण होता कामा नये. शिक्षण हा त्यांचा मूलभूत हक्क असून त्या दृष्टीने महानगरपालिकेच्या सर्व शाळांमध्ये अशा सुविधा उपलब्ध करून देण्याचा महानगरपालिकेचा मानस आहे. तसेच खासगी शाळांनीही आपल्या स्तरावर विद्यार्थिनींसाठी अशा सुविधा उपलब्ध करून द्याव्यात, असे आवाहन त्यांनी केले.

यावेळी उपायुक्त प्रसाद बोरकर, प्रशासन अधिकारी भारत बोरनारे, शिंदे सेनेच्या नगरसेविका नमिता पाटील, उद्धव सेनेच्या नगरसेविका तेजस्वी गायकवाड आदी मान्यवर उपस्थित होते.