कुतूहल : ठीक १२ वाजून २४ मिनीटांनी सावली झाली गायब
जळगाव : वर्षातून एकदा येणारा शून्य सावलीचा क्षण जळगावकरांनी मंगळवारी दुपारी अनुभवला. ठीक दुपारी १२.२४ मिनिटांनी ही सावली गायब झाली. जळगावकरांना ही अदभुत खगोलीय घटना पाहता येण्यासाठी खगोल अभ्यासक अमोघ जोशी यांनी फेसबुक लाईव्हच्या माध्यमातून ऑनलाईन कार्यक्रमाचे आयोजन केले होते.
माणसाच्या आयुष्यात सतत सोबत राहणारी सावली, मंगळवारी दुपारी मात्र अचानक गायब झाली. निसर्गाच्या या अदभूत घटनेला ‘शून्य सावली दिवस’ किंवा ‘झीरो शडो डे’ असेही म्हणतात. नागरीकांना हा क्षण खगोलीय भाषेतून समजण्यासाठी जळगावातील खगोलप्रेमी ग्रुपने वेगवेगळ्या प्रकारचे तीन सौर घड्याळ ठेवले होते. तसेच वेळ कशी दाखवतात, तसेच हातातील घड्याळ आणि सौर घड्याळ यांच्या वेळेत फरक का असतो, याच फारकामुळे हातातील घडाळ्याप्रमाणे शून्य सावली क्षण १२ वाजून २४ मिनिटांनी आणि सौर घड्याळाप्रमाणे १२ वाजता का होते , हे प्रात्यक्षिकाव्दारे समजून सांगण्यात आले. अशा प्रकारे खगोलप्रेमींनी त्यामागील विज्ञान फेसबुक लाईव्हच्या माध्यमातून समजावून सांगितले. यावेळी खगोल अभ्यासक किरण वंजारी, रेवती वंजारी, श्रेया चौरासिया, हितेंद्र आणि विवेक उपासनी उपस्थित होते. दरम्यान, या ऑनलाईन कार्यक्रमाच्या माध्यमातून हजारो जळगावकरांनी या शून्य सावली क्षणाचा आनंद घेतला.