कर्तव्याची जाणीव : जळगाव ते फैजपूर प्रवासादरम्यान केले कामकाज
जळगाव : दौर्यामुळे कामे प्रलंबित राहू नये म्हणून मुख्यमंत्र्यांनी विमानात त्यांच्यासोबत काही महत्त्वाच्या फाईल्स आणल्या होत्या. जळगाव ते फैजपूर या प्रवासादरम्यान त्यांनी त्या मार्गी लावल्या. दरम्यान, विमानतळावर स्वीय सहायक दुसर्या चारचाकीत असल्याने ते फायली घेऊन येईपर्यंत मुख्यमंत्री पृथ्वीराज चव्हाण जवळपास पाच मिनिटे विमानतळावर थांबले. यामुळे त्यांचा ताफाही पुढे सरकला नाही.
सकाळी ९.३0 वाजता मुख्यमंत्र्यांचे कुसुंबा येथे विमानतळावर आगमन झाले. त्यांच्यासोबत माजी केंद्रीयमंत्री सुशीलकुमार शिंदे, काँग्रेसचे प्रदेशाध्यक्ष माणिकराव ठाकरे, महसूलमंत्री बाळासाहेब थोरात होते.
स्वागत कार्यक्रमानंतर काही वेळ चव्हाण व इतर मंडळी विमानतळावरील विशेष दालनामध्ये बसली. त्यात काँग्रेसच्या मोजक्या पदाधिकार्यांनी मुख्यमंत्र्यांची भेट घेता आली.
थोडा वेळ या दालनात थांबल्यानंतर मुख्यमंत्री फैजपूरकडे जाण्यासाठी निघाले. वाहनांमध्ये सर्व मंडळी बसली. यातच मुख्यमंत्र्यांनी फैजपूर किती कि.मी. आहे? याची विचारणा केली. त्यांना ६0 कि.मी. असल्याचे सांगण्यात आले. तेवढय़ात त्यांनी निकाली काढण्याच्या फायलींसाठी स्वीय सहायकांची विचारणा केली. मुंबईहून त्यांनी या फायली विमानात सोबत आणल्या होत्या. पण स्वीय सहायक हे ताफ्यात मध्यभागी असलेल्या चारचाकीमध्ये होते. त्यांना बोलावले. त्यांच्याकडून फायली मागून घेतल्या व त्यांच्यावर मुख्यमंत्र्यांनी आपल्या वाहनामध्येच कामकाज सुरू केले.
प्रोटोकॉल म्हणून मुख्यमंत्र्यांना प्रशासनातर्फे मानवंदना देण्यात येते. ही मानवंदना घेण्याचा मान चव्हाण यांनी माजी केंद्रीय मंत्री शिंदेंना दिला, पण शिंदे यांनी बाबा, तुम्ही मानवंदना घ्या, असे म्हणत नम्रपणे मानवंदना घेण्यास नकार दिला. दरम्यान, विमानतळावर पालकमंत्री संजय सावकारे, काँग्रेसचे जिल्हाध्यक्ष अँड.संदीप पाटील, सहप्रभारी रमेश श्रीखंडे, माजी खासदार डॉ.उल्हास पाटील, माजी जिल्हाध्यक्ष उदय पाटील, डॉ.राधेश्याम चौधरी, राजस कोतवाल आदींनी त्यांचे स्वागत केले. मुख्यमंत्र्यांसाठी दुपारी ताटकळले
मुख्यमंत्री फैजपूर येथून आपला कार्यक्रम आटोपून कुसुंबा विमानतळावर येतील व त्यांची भेट घेऊ यासाठी काँग्रेसचे अनेक पदाधिकारी गुरुवारी दुपारी त्यांची प्रतीक्षा करीत होते. परंतु मुख्यमंत्र्यांचे वाहन थेट विमानतळावर पोहचले. तेथून ते लागलीच विमानात बसले व निघून गेले. त्यांना विमानतळावर भेटता येईल यासाठी अनेक पदाधिकारी प्रयत्न करीत होते, परंतु पोलिसांनी नकार दिला. माजी केंद्रीय मंत्री विजय नवल पाटील, शहर जिल्हाध्यक्ष डॉ.ए.जी.भंगाळे, ज्योत्स्ना विसपुते, अरुण चांगरे हे कसेबसे विमानतळाकडे पोहचले. मुख्यमंत्री विमानात बसल्याने ते भेटले नाही.
काही कार्यकर्ते नाराज
मुख्यमंत्र्यांना विमानतळावरील दालनात भेटण्यास जाणार्या व्यक्तींना जिल्हा प्रशासनाने पासचे वाटप केले होते.युवक काँग्रेसच्या कार्यकर्त्यांकडे पास नसल्याने त्यांना त्या दालनामध्ये जाण्यास मज्जाव केला.वासुदेव महाजन,संजय वराडे यांनी नाराजी व्यक्त केली.महाजन यांनी तर सहप्रभारी श्रीखंडे यांच्याकडेही नाराजी व्यक्त केली. श्रीखंडे यांनी महाजन व कार्यकर्त्यांची समजूत काढली.मुख्यमंत्री फैजपूरकडे जाण्यासाठी दालनातून बाहेर आल्यानंतर या कार्यकर्त्यांनी त्यांची भेट घेतली.