संजय लव्हाडे
लोकमत न्यूज नेटवर्क
जालना : मागील वर्षीच्या तुलनेत कमी उत्पादन झाल्यामुळे आणि नाफेडने विक्री बंद केल्यामुळे तुरीच्या दरात तेजी आली. परदेशातून मागणी वाढल्यामुळे कापूस महागला असून, त्यामुळे सरकी ढेपीच्या किमतीदेखील वाढल्या आहेत. सरत्या आठवड्यातील या घडामोडींमुळे व्यापारी आणि शेतकरीवर्गात उत्साहाचे वातावरण बघायला मिळाले.
दिल्ली बाजारपेठेत बर्माच्या नवीन लेमन तुरीच्या दरात सतत तेजी आल्यामुळे दर सहा हजार ६०० रुपये प्रतिक्विंटल असे झाले. त्यातच मागील वर्षीपेक्षा चालू वर्षात तुरीचे उत्पादन कमी झाले आणि नाफेडनेही ३० जानेवारीपासून तुरीची विक्री बंद केली. त्यामुळे तुरीच्या दरात एकतर्फी तेजी आली. जालना बाजारपेठेत सध्या तुरीची आवक दररोज तीन हजार पोते इतकी असून, ३०० रुपयांच्या तेजीनंतर भाव सहा हजार ५०० ते ७ हजार रुपये प्रतिक्विंटल असे आहेत.
निर्यात वाढल्यामुळे कपाशीच्या दरातही मोठी तेजी आली आहे. सरकारने कपाशीच्या खरेदी-विक्रीमध्ये कस्टम ड्यूटी वाढवल्यामुळेदेखील कापसाचे दर वाढले. जाणकारांच्या माहितीनुसार ब्राझील देशात यंदा कपाशीचे उत्पादन कमी झाले. त्यामुळे त्यांना भारतातून कापूस मागवावा लागत आहे. त्यामुळे भारतात कापसाच्या दरात तेजी आली आहे. जालना बाजारपेठेत कापसाचे दर सहा हजार ते ६१०० रुपये प्रतिक्विंटल असे आहेत.
कापूस महागल्यामुळे सरकी ढेप दरातही तेजी आली. सरकी ढेप क्विंटलमागे ३०० रुपयांनी महागली. सध्या सरकी ढेपचे भाव २६५० ते २७५० रुपये प्रतिक्विंटल असे आहेत. हा सरकी ढेपच्या दरातील चालू वर्षामधील उच्चांक मानला जातो.
गव्हाचे भाव स्थिर म्हणजे १६५० ते २३०० रुपये प्रतिक्विंटल असे आहेत. ज्वारीच्या दरात ४०० रुपयांची मंदी आल्याने भाव १२०० ते २५०० रुपये प्रतिक्विं. असे आहेत. मका १२५ रुपयांच्या मंदीनंतर एक हजार ५० ते १२५० रुपये प्रतिक्विंटलवर आहे. बाजरी ११२५ ते १४०० रुपये प्रतिक्विंटल आहे.
......
तेलामध्ये क्विंटलमागे ५०० रुपयांची तेजी
तेलामध्ये क्विंटलमागे प्रत्येकी ५०० रुपयांची तेजी आली.
सोयाबीन तेल - ११,८००
सरकी तेल -११,६००
पामतेल - ११,३००,
सूर्यफूल तेल -१३,०००
शेंगदाना तेल- १५,००० ते १६,०००
करडी तेल - १७,००० ते १८,०००
......
डाळींच्या दरातही वाढ
डाळींच्या दरातही २०० रुपयांपासून हजार रुपयांपर्यंत तेजी आली. हरभरा डाळ ५३०० ते ५५००, तूरडाळ ९००० ते १०,०००, मूगडाळ ९६०० ते ९८००, मसूर डाळ ६५०० ते ६८०० आणि उडद डाळीचे दर ९००० ते १०,५०० रुपये प्रतिक्विंटल असे आहेत.
.......
सोन्यात किंचित घसरण
सर्व किराणा आणि धान्य बाजारात तेजी असताना सोन्याच्या दरात मात्र किंचित घसरण झाली. तोळ्यामागे १५०० रुपयांची मंदी आल्यानंतर सोन्याचे दर ४९ हजार ५०० रुपये तोळा झाले. चांदीचे दर स्थिर म्हणजे ६८ हजार ९०० रुपये प्रतिकिलो आहेत.
.........