लोकमत न्यूज नेटवर्क
टेंभुर्णी : जाफराबाद तालुक्यातील सर्वांत मोठी ग्रामपंचायत असलेल्या टेंभुर्णीच्या सरपंच, उपसरपंच निवडीसाठी अखेर १२ तारखेचा मुहूर्त सापडला आहे. याबाबत तहसीलदारांनी शनिवारी आदेश जारी केला असून, या निवड प्रक्रियेसाठी अध्यासी अधिकारी म्हणून पंचायत समितीचे विस्तार अधिकारी जे.टी. नागरे यांची नियुक्ती करण्यात आली आहे.
टेंभुर्णीचे सरपंचपद मागासवर्गीय महिला संवर्गासाठी आरक्षित असल्याने या पदावर १० जागा जिंकून एकतर्फी बहुमत मिळवणाऱ्या भाजपच्या एकमेव महिला उमेदवार सुमन म्हस्के यांची निवड निश्चित मानली जात आहे. तरीही ६ जागा जिंकून विरोधी बाकावर असलेल्या राष्ट्रवादी काँग्रेसकडेही एक मागासवर्गीय महिला सदस्य असल्याने वेळेवर काही धोका होऊ नये, म्हणून भाजपचे सदस्य मागील १० दिवसांपूर्वीच सहलीवर निघून गेले आहेत.
भाजपतर्फे सरपंचपदावर सुमन म्हस्के यांच्या नावावर शिक्कामोर्तब झाल्यानंतर आता उपसरपंचपदी कोणाची वर्णी लागते, याकडे तालुक्याचे लक्ष लागले आहे. भाजपच्या १० सदस्यांमध्ये सलग चौथ्यांंदा निवडणूक जिंकलेले माजी सरपंच लक्ष्मण शिंदे व माजी उपसरपंच फैसल चाऊस हे दोघेच ज्येष्ठ सदस्य आहेत. त्यामुळे या दोहोंपैकी एकाची वर्णी लागण्याची दाट शक्यता दिसून येत आहे.
एकंदर सरपंचपदाचे नाव निश्चित झाल्यानंतर आता उपसरपंचपदी शिंदे की चाऊस, याकडे ग्रामस्थांचे लक्ष लागले आहे. तरीही अवघ्या ११ महिन्यांवर आलेल्या जिल्हा परिषद व पंचायत समिती निवडणुकांवर लक्ष ठेवून उपसरपंचपदाला न्याय देण्याचे मोठे दिव्य भाजप पक्षश्रेष्ठींना पार पाडावे लागणार आहे.