खळबळजनक! नांदेडच्या युवकाचा जालन्यात खून; तिसऱ्या दिवशी पटली मृताची ओळख

जालना शहरातील बसस्थानक परिसरात १० जून रोजी पहाटे ६ वाजण्याच्या सुमारास एका अनोळखी व्यक्तीचा मृतदेह आढळला होता.

जालना : शहरातील बसस्थानकाच्या परिसरात मंगळवारी १० जून रोजी एका अनोळखी व्यक्तीचा गळा आवळून खून केल्याचा प्रकार समोर आला होता. मयत व्यक्ती हा नांदेड शहरातील तरोडा बुद्रुक भागात राहणारा रामेश्वर दत्तराव पवार (वय ३७) असल्याचे गुरुवारी १२ जून रोजी सायंकाळी समोर आले आहे.

जालना शहरातील बसस्थानक परिसरात १० जून रोजी पहाटे ६ वाजण्याच्या सुमारास एका अनोळखी व्यक्तीचा मृतदेह आढळला होता. घटनेची माहिती मिळताच पोनि. संदीप भारती व त्यांच्या सहकाऱ्यांनी घटनास्थळी धाव घेऊन पाहणी केली. अपर पोलिस अधीक्षक आयुष नोपाणी, डीवायएसपी अनंत कुलकर्णी यांच्यासह इतर अधिकाऱ्यांनीही घटनास्थळी धाव घेऊन पाहणी केली होती. मृताच्या गळ्यात असलेला गमजा पाहता त्याचा गळा आवळून खून केल्याचा संशय व्यक्त करण्यात आला. पंचनाम्यानंतर जिल्हा रुग्णालयात शवविच्छेदन करण्यात आले. शवविच्छेदनाच्या प्राथमिक अहवालात संबंधित व्यक्तीचा गळा आवळून खून केल्याचे समोर आले होते. त्यानुसार सदरबाजार पोलिस ठाण्यात खुनाचा गुन्हा दाखल करण्यात आला होता. 

दरम्यान, पोनि. संदीप भारती व त्यांच्या सहकाऱ्यांनी तांत्रिक विश्लेषणाद्वारे केलेल्या तपासानंतर मयत व्यक्ती हा नांदेड शहरातील तरोडा बुद्रुक भागात राहणारा रामेश्वर पवार असल्याचे समोर आले होते. पोलिसांनी नातेवाईकांशी संपर्क साधून गुरुवारी सायंकाळी बोलावून घेतले. मयताची ओळख पटल्यानंतर पोलिसांनी विविध ठिकाणचे संकलित केलेले सीसीटीव्ही फुटेज नातेवाईकांना दाखविले असून, पवार यांचा खून कोणी आणि कोणत्या कारणामुळे केला याचा तपास सुरू करण्यात आला आहे.