Video: बदली रद्द झाली म्हणून डीजे लावून मिरवणूक; महावितरणनने अभियंत्याला घरी बसवलं
By दिपक ढोले | Updated: August 24, 2023 17:47 IST2023-08-24T17:47:20+5:302023-08-24T17:47:58+5:30
रत्नागिरी येथील बदली रद्द झाल्याने कंत्राटदार आणि समर्थकांनी काढली डीजे लावून मिरवणूक

Video: बदली रद्द झाली म्हणून डीजे लावून मिरवणूक; महावितरणनने अभियंत्याला घरी बसवलं
जालना : रत्नागिरी येथे झालेली बद्दली रद्द झाल्याने डीजे लावून मिरवणूक काढणे सहायक अभियंत्यास चांगलेच अंगलट आले आहे. प्रकाश चव्हाण असे त्या अभियंत्याचे नाव आहे. गुन्हा दाखल झाल्यानंतर आता त्यांचे निलंबन करण्यात आले आहे. याबाबतचे आदेश बुधवारी रात्री काढण्यात आले आहेत.
महावितरणच्याजालना ग्रामीण विभागात सहायक अभियंता असलेले प्रकाश चव्हाण यांची दीड महिन्यापूर्वी रत्नागिरी झोनमध्ये बदली झाली होती. मात्र, एकाच महिन्यात त्यांची रत्नागिरी येथील बदली रद्द होऊन परत जालना येथेच झोन क्र. ३ मध्ये त्याच ठिकाणी त्यांची बदली करण्यात आली. १८ ऑगस्ट रोजी बदलीचे आदेश हातात पडताच ते शहरात दाखल झाले. चव्हाण हे जालन्यात आल्याची माहिती मिळताच काही कंत्राटदार व समर्थकांनी राजूर चौफुली येथूून त्यांना खांद्यावर घेत डीजे लावून वाजतगाजत जंगी मिरवणूक काढली. मिरवणुकीने कार्यालयात आल्यानंतर सदर बाजारच्या हद्दीत भररस्त्यावर मांडव टाकून त्यांचा स्वागतसोहळाही साजरा करण्यात आला.
डीजेला परवानगी नसल्याने आणि रस्त्यावरील मांडवामुळे वाहतुकीला अडथळा निर्माण झाल्याने सदर बाजार पोलिस ठाण्याचे पोलिस निरीक्षक प्रशांत महाजन यांनी तातडीने ॲक्शन घेतली. या प्रकरणी पो. कॉ. मधुर राजमाने यांच्या फिर्यादीवरून सहायक अभियंता प्रकाश चव्हाण यांच्यासह २० ते ३० जणांविरुद्ध भादंवि. १४३, १८८, २८३, मपोका. १३५ कलमान्वये सदर बाजार पोलिस ठाण्यात गुन्हा दाखल करण्यात आला होता. यानंतर महावितरण कंपनीनेही त्यांच्यावर कारवाई केली आहे. जालन्याचे अधीक्षक अभियंता संजय सरग यांनी बुधवारी रात्री प्रकाश चव्हाण यांचे निलंबन केल्याचे आदेश काढले आहेत.