जालना : जिल्हा परिषदेच्या यांत्रिक विभागात रोखपाल पदावर कार्यरत असलेला पंकज चौधरी व उपअभियंता विकास मधुकर सगदेव यांनी कर्मचाऱ्यांच्या वेतनातील भविष्य निर्वाह निधी, गट विमा योजना आदींची रक्कम लेखाशीर्षात जमा न करता स्वत:च्या खात्यात वर्ग करून २५ लाख रुपये हडपले होते. या प्रकरणी १५ जुलै २०२० रोजी कदीम जालना पोलीस ठाण्यात गुन्हा दाखल करण्यात आला होता. तेव्हापासून पोलीस मुख्य संशयित आरोपी पंकज चौधरी याच्यासह अन्य आरोपींच्या मागावर होते. अखेर गुरुवारी कदीम जालना पोलिसांनी पंकज चौधरीला औरंगाबाद येथून ताब्यात घेतले.
जालना जिल्हा परिषदेच्या यांत्रिक विभागात रोखपाल पदावर असलेल्या पंकज चौधरी याने २०१९मध्ये कर्मचाऱ्यांच्या वेतनातील भविष्य निर्वाह निधी, गट विमा योजना, घरबांधणी कर्ज, व्यवसाय कर व आयकर आदींची रक्कम लेखाशीर्षात जमा न करता स्वत:च्या खात्यात वर्ग केली होती. ही बाब जुलै २०२०मध्ये उपअभियंता प्रमोद खोत यांच्या लक्षात आली. त्यांनी याची तक्रार जिल्हा परिषदेच्या मुख्य कार्यकारी अधिकाऱ्यांकडे केली होती. या प्रकरणी चौकशी लावण्यात आली होती. चौकशीत पंकज चौधरी याने उपअभियंता विकास सगदेव यांच्या मदतीने २५ लाख रुपयांचा भ्रष्टाचार केल्याचे समोर आले. याप्रकरणी उपमुख्य लेखा व वित्त अधिकारी प्रवीण निर्मळ यांच्या फिर्यादीवरून पंकज बाबूराव चौधरी व विकास मधुकर सगदेव यांच्याविरुद्ध गुन्हा दाखल करण्यात आला होता. तेव्हापासून पंकज चौधरी व विकास सगदेव हे दोघे फरार होते. भ्रष्टाचार केल्याप्रकरणी बुधवारी पंकज चौधरी याची औरंगाबाद येथील विभागीय आयुक्त कार्यालयात सुनावणी होती. याची माहिती कदीम जालना पोलीस ठाण्याच्या सपोनि बनसोड यांना मिळाली. या माहितीवरून पथक पाठवून त्यांनी चौधरीला अटक केली. त्याला न्यायालयात हजर केले असता, न्यायालयाने त्याला १८ फेब्रुवारीपर्यंत पोलीस कोठडी सुनावली आहे. ही कारवाई पोलीस अधीक्षक विनायक देशमुख, अपर पोलीस अधीक्षक विक्रांत देशमुख, उपविभागीय पोलीस अधिकारी सुधीर खिरडकर यांच्या मार्गदर्शनाखाली सपोनि बनसोड, पोलीस कर्मचारी विठ्ठुल खार्डे यांनी केली.