मंठ्यात भावानेच केला भावाचा खून

फोटो मयत अमोल रणभवरे

मंठा (जि. जालना) : मारहाण केल्याचा राग मनात धरून चुलत भावाने काठीने मारहाण करून भावाचा खून केल्याची घटना मंठा शहरातील शासकीय गोदामाजवळ रविवारी सकाळी उघडकीस आली. अमोल मारोती रणभवरे (वय २२, रा. मंठा) असे मयताचे नाव आहे.

अमोल रणभवरे हा औरंगाबाद येथे मावशीकडे राहतो. शनिवारी तो मंठा येथे चुलते अंबादास रणभवरे यांच्याकडे आला होता. अमोलने सायंकाळी दारू पिऊन चुलत्याकडे पैशांची मागणी केली. त्यांनी पैसे न दिल्याने वाद घालून तो निघून गेला. रात्री साडेबारा वाजेच्या सुमारास अमोल आणि त्याचा चुलत भाऊ सचिन रणभवरे यांची मंठा फाट्यावरील शासकीय गोदामाजवळ भेट झाली. अमोलने सचिनकडे पैशांची मागणी केली. पैसे देण्यास नकार दिल्याने अमोलने सचिनला मारहाण केली. त्यानंतर सचिन हा घरी निघून गेला. मारहाण झाल्याचा राग मनात धरून सचिन पुन्हा मंठा फाट्यावर गेला. त्याने अमोलला झाडाची फांदी तोडून मारहाण केली. यात अमोल गंभीर जखमी झाला. त्यानंतर सचिन घरी निघून गेला. गुरुवारी सकाळी साडेआठ वाजेच्या सुमारास सचिन पुन्हा शासकीय गोदामाजवळ आला. त्याला अमोल मृत अवस्थेत दिसला. त्याने याची माहिती चुलते अंबादास रणभवरे यांना दिली. त्यानंतर पोलिसांना कळविण्यात आले. घटनेची माहिती मिळताच पोलीस निरीक्षक विलास निकम, पोलीस उपनिरीक्षक नितीन गट्टूवार, ए.जे. शिंदे, पोलीस कॉ. श्याम गायके, केशव चव्हाण, देशमुख यांनी घटनास्थळी धाव घेतली. या प्रकरणी अंबादास बाबूराव रणभवरे यांच्या फिर्यादीवरून मंठा पोलीस ठाण्यात खुनाचा गुन्हा दाखल करण्यात आला.

आरोपी अटकेत

माहिती मिळाल्यानंतर पोलीस उपविभागीय अधिकारी इंदलकर बहुरे यांनी घटनास्थळाची पाहणी केली. संशयित आरोपी सचिन बबन रणभवरे (२३, रा. मंठा) याला पोलिसांनी ताब्यात घेतले असून, पुढील तपास पोलीस निरीक्षक विलास निकम करीत आहेत.