ब्रिटनला मिळणार पहिली मुस्लिम महिला पंतप्रधान? कोण आहेत शबाना महमूद, ज्यांच्या नावाची सुरू आहे चर्चा 

ब्रिटनच्या पहिल्या मुस्लिम महिला पंतप्रधान म्हणून शबाना महमूद यांचे नाव आघाडीवर आले आहे.

ब्रिटनच्या राजकारणात सध्या मोठी उलथापालथ सुरू असून पंतप्रधान कीर स्टारमर यांच्या अडचणीत प्रचंड वाढ झाली आहे. लेबर पार्टीमध्येच स्टारमर यांच्या विरोधात बंडाचे निशाण फडकवले जात असताना, ब्रिटनच्या पहिल्या मुस्लिम महिला पंतप्रधान म्हणून शबाना महमूद यांचे नाव आघाडीवर आले आहे. शबाना सध्या ब्रिटनच्या गृहमंत्री असून, त्यांच्या वाढत्या प्रभावामुळे ब्रिटनच्या राजकारणात नवा इतिहास रचला जाण्याची शक्यता निर्माण झाली आहे.

'एपस्टीन फाईल्स'ने वाढवले कीर स्टारमर यांचे टेन्शन

ब्रिटनमध्ये लेबर पार्टीचे सरकार असून संसदेत ६५० पैकी ४०४ जागांसह त्यांचे वर्चस्व आहे. मात्र, अमेरिकेत सार्वजनिक झालेल्या 'एपस्टीन फाईल्स'मुळे स्टारमर अडचणीत आले आहेत. त्यांनी नियुक्त केलेले राजदूत पीटर मंडेलसन यांचे नाव या फाईल्समध्ये आल्याने पक्षातील खासदार संतापले आहेत. स्टारमर यांनी राजीनामा द्यावा किंवा त्यांना पदावरून हटवावे, अशी मागणी जोर धरत आहे. याच पार्श्वभूमीवर शबाना महमूद यांचे नाव पंतप्रधान पदासाठी चर्चेत आले आहे.

कोण आहेत शबाना महमूद?

४५ वर्षीय शबाना महमूद या पेशाने बॅरिस्टर असून लेबर पार्टीतील एक प्रभावशाली वक्त्या म्हणून ओळखल्या जातात. १९८० मध्ये बर्मिंगहॅममध्ये जन्मलेल्या शबाना यांनी २००२ मध्ये ऑक्सफर्ड विद्यापीठातून कायद्याचे शिक्षण पूर्ण केले. शबाना यांचे कुटुंब मूळचे पाकव्याप्त काश्मीरमधील मीरपूरचे आहे. २०१० मध्ये त्या पहिल्यांदा संसदेत पोहोचल्या. ब्रिटनच्या पहिल्या तीन मुस्लिम महिला खासदारांमध्ये त्यांचा समावेश होतो. २०२५ मध्ये त्यांच्याकडे गृहमंत्रालयासारख्या महत्त्वाच्या खात्याची जबाबदारी सोपवण्यात आली.

कडक धोरणांमुळे 'लेडी आयर्न'ची ओळख

शबाना महमूद यांची ओळख एकीकडे मुस्लिम समुदायाचे प्रतिनिधित्व करणारी नेत्या म्हणून आहे, तर दुसरीकडे त्यांची धोरणे अत्यंत कडक आहेत. गृहमंत्री म्हणून त्यांनी 'इमिग्रेशन' नियमात मोठी कपात करण्याची योजना आखली आहे. "ब्रिटनमध्ये कायमस्वरूपी निवास मिळवणे हा अधिकार नसून ती एक विशेष सुविधा आहे," अशा शब्दांत त्यांनी आपली कठोर भूमिका स्पष्ट केली होती. यामुळे दक्षिणपंथी लोकांमध्येही त्यांच्याबद्दल आदराची भावना आहे.

पंतप्रधान होण्याचा मार्ग कसा असेल?

शबाना महमूद यांना पंतप्रधान व्हायचे असेल, तर प्रथम कीर स्टारमर यांना पायउतार व्हावे लागेल. पक्षांतर्गत नेतृत्वाला आव्हान देण्यासाठी किमान ८१ लेबर खासदारांचा पाठिंबा आवश्यक आहे. सध्याच्या वातावरणात शबाना महमूद या स्टारमर यांच्या सर्वात मोठ्या पर्याय म्हणून समोर येत आहेत. जर असे घडले, तर ब्रिटनला ऋषी सुनक यांच्यानंतर पुन्हा एकदा आशियाई वंशाचा पंतप्रधान मिळेल.