जगभर: चिनी राष्ट्राध्यक्षांच्या ‘अज्ञात’ मुलीची ‘हेरगिरी’! शी जिनपिंग यांची मुलगी कोण?

Xi Mingze: इतरही अनेक देशांच्या राष्ट्रप्रमुखांची मुलं-मुली जगाला अपरिचित नाहीत. पण चीनचे राष्ट्राध्यक्ष शी जिनपिंग यांच्या मुलीबाबत कुणाला काही माहीत आहे?

अमेरिकेचे राष्ट्राध्यक्ष डोनाल्ड ट्रम्प यांची मुलगी इवांका ट्रम्प, अमेरिकेचे माजी राष्ट्राध्यक्ष बराक ओबामा यांच्या मुली मालिया आणि साशा.. यांना जग बऱ्यापैकी ओळखतं. कुठल्या ना कुठल्या सार्वजनिक कार्यक्रमांत त्या कायम दिसत असतात. इतरही अनेक देशांच्या राष्ट्रप्रमुखांची मुलं-मुली जगाला अपरिचित नाहीत. पण चीनचे राष्ट्राध्यक्ष शी जिनपिंग यांच्या मुलीबाबत कुणाला काही माहीत आहे? किंबहुना त्यांना एखादी मुलगी आहे, हे तरी जगात फारसं कोणाला ठाऊक आहे? याबाबतीत शी जिनपिंग आणि रशियाचे सर्वेसर्वा पुतीन यांच्यात बऱ्यापैकी साम्य आहे. 

या दोघांनीही आपल्या मुलांबाबत फारशी कुठे वाच्यता केलेली नाही आणि त्यांना जगाच्या नजरेसमोरही आणलं नाही. उलट होता होईतो जगापासून आपली अपत्ये लांबच कशी राहतील याचाच त्यांनी आजवर प्रयत्न केला आहे. पण शी जिनपिंग यांना एक मुलगी आहे आणि ती सध्या अमेरिकेत आहे, हे ‘गुपित’ सध्या सगळीकडेच फुटलं आहे. 

शी जिनपिंग यांच्या मुलीचं नाव शी मिंगजे. ती अमेरिकेतील हार्वर्ड विद्यापीठाची पदवीधर आहे. सध्या तिच्यावरूनच राजकारण तापलं आहे. शी मिंगजे सध्या अमेरिकेतील मॅसाच्युसेट्स येथे चिनी मिलिटरीच्या कडेकोट बंदोबस्तात ‘गुप्तपणे’ राहत आहे, अशी चर्चा आहे. 

डोनाल्ड ट्रम्प यांनी परदेशी त्यातही चिनी विद्यार्थ्यांच्या व्हिसाबाबत कडक धोरण स्वीकारल्यानंतर आणि हार्वर्ड विद्यापीठावर डोळे वटारल्यानंतर शी मिंगजेचीही आता अमेरिकेतून हकालपट्टी होणार का, याविषयीच्या चर्चा संपूर्ण जगभरात रंगल्या आहेत. शी मिंगजेबाबत अनेक गोष्टींना आता उधाण आलं आहे. शी जिनपिंग यांची ती एकुलती एक मुलगी आहे. 

तिच्याविषयी सध्या फारच थोडी माहिती लोकांना आहे. तिचा जन्म २७ जून १९९२ला झाला. मिंगजे पहिल्यांदा चर्चेत आली, जेव्हा २००८मध्ये सिचुआन येथे भूकंप आला होता, त्यावेळी ती शाळेतून सुटी घेऊन एक आठवड्यासाठी तेथील बचाव कार्यात सहभागी झाली होती. भूकंपात गंभीर जखमी झालेल्या लोकांची तिनं मनोभावे सेवाही केली होती. त्यावेळी ती १६ वर्षांची होती. 

२०१० मध्ये अमेरिकेत हॉर्वर्ड विद्यापीठात शिकण्यासाठी ती गेली. आपली ओळख गुप्त ठेवण्यासाठी तिनं तिथे बनावट नावाचा वापर केला. २०१२मध्ये वॉशिंग्टन पोस्टनं पहिल्यांदा या गोष्टीचा भंडाफोड केला. तिथे ज्यांचा तिच्याशी परिचय झाला, त्यांच्या मते मिंगजे ही अतिशय शांत, अभ्यासू आणि राजकारणात रुची असलेली तरुणी आहे. 

तिची आई पेंग लियुआन गायिका आहे. तिचे आजोबा शी झोंगशून हे कम्युनिस्ट क्रांतिकारक होते. ते आपल्या नातीला प्रेमानं ‘शियाओ मुझी’ म्हणायचे. याचा अर्थ एक साधीभोळी, पण सामाजाला उपयोगी पडणारी मुलगी. मिंगजेचं चिनी भाषेबरोबरच इंग्रजी आणि फ्रेंचवरही प्रभुत्व आहे. मिंगजे सध्या संपूर्ण जगात चर्चेत असली तरी तिच्या ‘हेरगिरी’बाबत अनेक गोष्टी अजूनही रहस्यमयच आहेत. 

अमेरिकेलाही शिंगावर घेऊ पाहणारे चीनचे सर्वोच्च नेते शी जिनपिंग आपल्या मुलीची अमेरिकेतून हकालपट्टी होण्यापासून वाचवू शकतील का, हा प्रश्न सध्या फारच चर्चेत आहे. पण त्याहीपेक्षा मिंगजे अजूनही अमेरिकेतच आहे की चीनमध्ये परतली, याबाबतही ठोसपणे अजून कोणालाच काहीच माहीत नाही.