'आपण मोठी चूक करतोय', भारतावर कर लादल्यामुळे माजी अमेरिकन मंत्र्यांची ट्रम्प सरकारवर टीका

US ex Commerce Secretary Gina Raimondo: 'भारत आणि युरोपसारख्या देशांशी मजबूत व्यापारिक संबंध निर्माण करण्याची गरज आहे. '

US ex Commerce Secretary Gina Raimondo: अमेरिकेच्या माजी वाणिज्य सचिव जीना रायमोंडो यांनी ट्रम्प प्रशासनाच्या व्यापार धोरणावर तीव्र टीका केली आहे. त्यांनी म्हटले की, अमेरिकाभारत आणि इतर जागतिक सहयोगींशी मोठी चूक करत आहे. ‘अमेरिका फर्स्ट’ ठीक आहे, पण ‘अमेरिका अलोन’ ही नीति विनाशकारी आहे.

रायमोंडो हार्वर्ड केनेडी स्कूलच्या इन्स्टिट्यूट ऑफ पॉलिटिक्समध्ये बोलत होत्या. यावेळी त्यांनी इशारा दिला की, अमेरिकेच्या सध्याच्या भूमिकेमुळे देश आपल्या महत्त्वाच्या आर्थिक आणि रणनीतिक भागीदारांपासून दूर जात आहे.

भारताशी संबंध सुधारण्याची गरज

रायमोंडो यांनी विशेषतः भारताचा उल्लेख करताना सांगितले की, आपण भारतासोबत मोठी चूक करत आहोत. भारत आणि युरोपसारख्या देशांशी मजबूत व्यापारिक संबंध निर्माण करण्याची गरज आहे. तसेच, जागतिक पातळीवर मजबूत भागीदारी आवश्यक असल्याचेही त्यांनी स्पष्ट केले.

दरम्यान, त्यांची ही टिप्पणी अशा वेळी आली आहे, जेव्हा भारत आणि अमेरिका यांच्यातील द्विपक्षीय व्यापार करार (BTA) अंतिम टप्प्यात आहे. दोन्ही देशांमध्ये बहुतांश मुद्द्यांवर सहमती झाली असून, कराराच्या कायदेशीर भाषेवर काम सुरू आहे.

टॅरिफ विवाद अजून सुटलेला नाही

अमेरिकेने भारतावर लावलेल्या 50% टॅरिफ शुल्कांबाबत स्थिती अद्याप स्पष्ट नाही. हे शुल्क ऑगस्ट महिन्यात भारताच्या रशियाकडून ऊर्जा खरेदीबद्दलच्या शिक्षेसारखे लागू करण्यात आले होते. त्यामुळे सप्टेंबरमध्ये भारताची अमेरिकेला होणारी निर्यात 12% ने कमी झाली, मात्र एकूण निर्यात 6.74% ने वाढली.