रशिया आणि चीन ब्रिक्सची ताकद वाढवणार अन्..; व्लादिमीर पुतिन यांचा अमेरिकेवर निशाणा

Vladimir Putin in China: व्लादिमीर पुतिन सध्या चीनच्या दौऱ्यावर आहेत.

Vladimir Putin in China:रशियाचे राष्ट्राध्यक्ष व्लादिमीर पुतिन एससीओ शिखर परिषदेसाठी चीनमध्ये आले आहेत. या परिषदेत पंतप्रधान नरेंद्र मोदींसह अनेक देशांचे राष्ट्रप्रमुख सहभागी झाले आहेत. दरम्यान, यावेळी पुतिन यांनी अमेरिकेचे नाव न घेता निशाणा साधला. ते म्हणाले की, 'ब्रिक्स देशांच्या विकासात अडथळा आणणाऱ्या भेदभावपूर्ण निर्बंधांविरुद्ध रशिया आणि चीनने एक समान भूमिका घेतली आहे.' पुतिन यांनी आशा व्यक्त केली की, एससीओ शिखर परिषदेमुळे संघटनेची ताकद वाढेल आणि जागतिक व्यवस्था सुधारेल.

चीनच्या सरकारी वृत्तसंस्था शिन्हुआला दिलेल्या मुलाखतीत पुतिन म्हणाले, 'ब्रिक्स देशांच्या सामाजिक आणि आर्थिक विकासात अडथळा आणणाऱ्या भेदभावपूर्ण निर्बंधांविरुद्ध रशिया आणि चीनने एक समान भूमिका घेतली आहे. रशिया आणि चीन महत्त्वाच्या पायाभूत सुविधा प्रकल्पांसाठी संयुक्तपणे संसाधने एकत्रित करत आहेत आणि जागतिक आव्हानांना तोंड देण्यासाठी ब्रिक्स संघटनेची ताकद वाढवण्यासाठी काम करत आहेत. '

शिखर परिषदेतून एससीओला बळ मिळेल
पुतिन पुढे म्हणाले, रशिया आणि चीन ब्रिक्स देशांच्या आणि संपूर्ण जगाच्या विकासात अडथळा आणणाऱ्या निर्बंधांना संयुक्तपणे विरोध करत आहेत. पुतिन यांनी आशा व्यक्त केली की एससीओ शिखर परिषदेमुळे संघटनेला अधिक बळ मिळेल. यामुळे युरेशिया प्रदेशात आव्हानांना एकत्रितपणे तोंड देण्यास आणि एकता वाढविण्यास मदत होईल. यामुळे अधिक न्याय्य आणि संतुलित जागतिक व्यवस्था निर्माण होण्यास मदत होईल.

पुतिन यांचे हे विधान अशा वेळी आले आहे जेव्हा अमेरिकेचे अध्यक्ष डोनाल्ड ट्रम्प यांनी ब्रिक्स देशांवर १०% कर लादण्याची धमकी दिली आहे. ट्रम्प ब्रिक्स देशांच्या चलनाविरुद्ध देखील आहेत. मात्र, ब्रिक्सने अद्याप कोणत्याही चलनावर निर्णय घेतलेला नाही.

ब्रिक्स म्हणजे काय?
ब्रिक्स ही एक आंतरराष्ट्रीय संघटना आहे ज्यामध्ये ब्राझील, रशिया, भारत, चीन आणि दक्षिण आफ्रिका यांचा समावेश आहे. अलीकडेच सौदी अरेबिया, इराण, इथिओपिया, इजिप्त, अर्जेंटिना आणि युएई यांचाही समावेश करण्यात आला आहे.