होर्मुझनंतर आता इराणने 'यानबू'ला केले लक्ष्य; सौदीच्या सॅमरेफ रिफायनरीवर केला हल्ला

कतार आणि संयुक्त अरब अमिरातीमधील ऊर्जा सुविधांवर झालेल्या हल्ल्यांनंतर, गुरुवारी सौदी अरेबियाच्या यानबू येथील अरामको सॅमरेफ रिफायनरीवर हवाई हल्ला झाला.

सौदी अरेबियाच्या लाल समुद्राच्या किनाऱ्यावरील यानबू बंदरात असलेल्या, सौदी अरामको आणि एक्सॉनमोबिल यांच्या संयुक्त उपक्रमाच्या सॅमरेफ रिफायनरीवर गुरुवारी हवाई हल्ला झाला. या हल्ल्यात मोठे नुकसान झालेले नाही.  इराणच्या इस्लामिक रिव्होल्यूशनरी गार्ड कॉर्प्सने सॅमरेफसह सौदी अरेबिया, संयुक्त अरब अमिराती आणि कतारमधील अनेक ऊर्जा सुविधा रिकाम्या करण्याचा इशारा दिल्यानंतर लगेचच हा हल्ला झाला आहे. इराणच्या ऊर्जा सुविधांवर झालेल्या अमेरिका-इस्त्रायल हल्ल्यांच्या प्रत्युत्तरादाखल हा हल्ला झाल्याचे मानले जात आहे.

गेल्या महिन्यात युद्ध सुरू झाल्यापासून इराणने होर्मुझची सामुद्रधुनी बंद केल्यामुळे, सध्या यानबू बंदर हा आखाती देशांमधून कच्च्या तेलाच्या निर्यातीसाठी एकमेव प्रमुख मार्ग आहे.

सेन्सेक्स-निफ्टी १० वर्षांच्या सरासरीच्या खाली; गुंतवणूक करण्याची हीच का योग्य वेळ? तज्ज्ञांचा काय सल्ला?

या अरुंद मार्गातून जगातील एक पंचमांश तेलपुरवठा होतो. यापूर्वी, फुजैरा बंदरावरही हल्ले झाले होते, यामुळे जागतिक ऊर्जा संकट अधिकच गडद झाले.

इराक आणि इराणसह अनेक आखाती देश मिळून जागतिक तेलाच्या ३१ टक्के आणि वायूच्या ८-१७ टक्के उत्पादन करतात. कतारच्या रास लाफान एलएनजी प्रकल्पावर इराणने केलेल्या क्षेपणास्त्र हल्ल्यात मोठ्या प्रमाणात नुकसान झाले.

ऊर्जा संकट वाढणार

सामरेफ रिफायनरीवरील हल्ल्यामुळे तेल बाजारातील अस्थिरता आणखी वाढेल. सौदी अरेबिया आणि प्रादेशिक देश ऊर्जा सुरक्षेला प्राधान्य देत आहेत, पण इराणच्या प्रत्युत्तरात्मक हल्ल्यांमुळे तणाव निर्माण झाला आहे. जर हे हल्ले सुरूच राहिले, तर जागतिक तेलाच्या किमती आणखी वाढू शकतात, यामुळे पुरवठ्यावर गंभीर परिणाम होईल.