"इराणने आता शांततेच्या मार्गावर यावे, अन्यथा...", अणुकेंद्रांवरील हल्ल्यानंतर डोनाल्ड ट्रम्प यांचा सक्त इशारा
By ऑनलाइन लोकमत | Updated: June 22, 2025 09:08 IST2025-06-22T08:51:57+5:302025-06-22T09:08:20+5:30
US Attack On Iran Nuclear Site: इराणमधील तीन अणुकेंद्रांना लक्ष्य करत केलेल्या हल्ल्यानंतर देशाला संबोधित करताना अमेरिकेचे राष्ट्राध्यक्ष डोनाल्ड ट्रम्प यांनी इराणला सक्त इशारा दिला आहे. इराणने आता शांततेच्या मार्गावर यावे अन्यथा इराणवर आणखी मोठे हल्ले होतील, अशी ताकिद डोनाल्ड ट्रम्प यांनी दिली आहे.
"इराणने आता शांततेच्या मार्गावर यावे, अन्यथा...", अणुकेंद्रांवरील हल्ल्यानंतर डोनाल्ड ट्रम्प यांचा सक्त इशारा
मध्य-पूर्वेमध्ये इस्राइल आणि इराण यांच्यात सुरू असलेल्या संघर्षामध्ये आता अमेरिकेचाही थेट प्रवेश झाला आहे. अमेरिकेने इराणमधील तीन प्रमुख अणुकेंद्रांना अत्याधुनिक बी-२ बॉम्बर्स विमानांद्वारे हल्ला करत लक्ष्य केले आहे. त्यानंतर देशाला संबोधित करताना अमेरिकेचे राष्ट्राध्यक्ष डोनाल्ड ट्रम्प यांनी इराणला सक्त इशारा दिला आहे. इराणने आता शांततेच्या मार्गावर यावे अन्यथा इराणवर आणखी मोठे हल्ले होतील, अशी ताकिद डोनाल्ड ट्रम्प यांनी दिली आहे.
इराणमधील फोर्डो, नतांज आणि इस्पाहान येथील अणुकेंद्रांना लक्ष्य केल्यानंतर डोनाल्ड ट्रम्प यांनी देशावासियांना संबोधित केले. त्यात ते म्हणाले की, आम्ही एक अवघड लक्ष्य निवडलं होतं. रात्री आम्ही ते साध्य करण्यात यश मिळवलं. इराणमधील प्रमुख अणुकेंद्रांना पूर्णपणे नष्ट करण्यात आलं आहे. अमेरिकन सैन्याने रात्री जशी कामगिरी केली तशी जगातील कुठलंही सैन्यदल करू शकत नाही.
डोनाल्ड ट्रम्प पुढे म्हणाले की, इराणची अणुसंवर्धनाची क्षमता नष्ट करणे आणि त्याच्यापासून निर्माण होणाऱ्या संभाव्य आण्विक संकटाला पूर्णपणे नष्ट करणे हा अमेरिकेचा हेतू होता. मागच्या ४० वर्षांपासून इराण अमेरिकेविरोधात कारवाया करत होता. तसेच अनेक अमेरिकन नागरिक त्याची शिकार झाले होते. त्यामुळे हे आता फार काळ चालणार नाही, असा निश्चय मी केला होता.
#WATCH | US strikes Iran's three nuclear facilities
— ANI (@ANI) June 22, 2025
US President Donald Trump says, "Our objective was the destruction of Iran's nuclear enrichment capacity and a stop to the nuclear threat posed by the world's number one state sponsor of terror. Tonight, I can report to the… pic.twitter.com/KQdMgczaJo
मध्य पूर्वेत दादागिरी करणाऱ्या इराणने आता शांतता प्रस्थापित केली पाहिजे. जर त्यांनी तसं केलं नाही तर त्यांच्यावर आणखी मोठे हल्ले होतील, असा इशाराही डोनाल्ड ट्रम्प यांनी दिला. ते पुढे म्हणाले की, मागच्या ४० वर्षांपासून इराण इस्राइलला, अमेरिकेला संपवण्याची भाषा बोलत आहे. इराणने आमच्या अनेक लोकांना मारले आहे. बॉम्बहल्ले करून अनेकांचा हातपाय तोडले आहेत. इराणी जनरल कासिम सुलेमानी याने अनेकांची हत्या केली आहे. त्यामुळेच हे फार काळ चालू देणार नाही, असं मी ठरवलं होतं, असेही डोनाल्ड ट्रम्प देशाला संबोधित करताना म्हणाले.