युक्रेनने रशियाच्या ओलेन्या आणि बेलाया या दोन महत्त्वाच्या हवाई तळांवर हल्ला केल्याचे वृत्त आहे. युक्रेनियन सैन्याने या हल्ल्यासाठी ड्रोनचा वापर केला. लक्ष्य करण्यात आलेली दोन्ही हवाई तळं रशिया-युक्रेन सीमेपासून बरीच आत आहेत. महत्वाचे म्हणजे, हा हल्ला आपण केलेला आतापर्यंतचा सर्वात मोठा ड्रोन हल्ला असल्याचे युक्रेनियन सूत्रांनी म्हटले आहे. महत्वाचे म्हणजे, युक्रेनने अशा तळांना निशाणा बनवले आहे, ज्यांचा वापर रशिया त्यांच्यावर बॉम्बिंग करण्यासाठी करत होता.
यासंदर्भात बोलताना युक्रेनने म्हटले आहे की, आपण रशियातील अनेक हवाई तळांवर ड्रोनने हल्ले केले आहेत. या हल्ल्यांत रशियाचे ४० हून अधिक बॉम्बर्स नष्ट झाले आहेत. याच विमानांचा वापर रशिया युक्रेनवर बॉम्बिंग करण्यासाठी करत होता. युक्रेनचे म्हणणे आहे की, हीच विमाने युक्रेनवर घिरट्या घालत होते आणि बॉम्बिंग करत होते.
महत्वाचे म्हणजे, आमचे ड्रोन रशियामध्ये दूरवर जाऊन Tu-95, Tu-22 आणि महागडे तथा दुर्मिळ A-50 हेरगिरी करणाऱ्या विमानांना निशाणा करण्यात यशस्वी ठरले, असे युक्रेनच्या सुरक्षा सेवेच्या (SBU) अधिकाऱ्याने सांगितले.
एसबीयूने म्हटले आहे की, "बेलाया" या एअर बेसवर हल्ला झाला. जे रशियातील इर्कुत्स्क भागात आहे. याशिवाय, "ओलेन्या" एअर बेसवरही आग लागल्याचे वृत्त आहे. मात्र अद्याप याची अधिकृत पुष्टी झालेली नाही.
ही विमाने रशियासाठी अत्यंत महत्त्वाची आहेत. उदाहरणार्थ, Tu-95 हे १९५० च्या दशकातील जुने विमान आहे. मात्र, ते अजूनही अनेक क्रूझ क्षेपणास्त्रे वाहून नेण्यास सक्षम आहे. जे दूरवरच्या शहरांनाही लक्ष्य करू शकते. या विमानात जेट इंजिनऐवजी मोठे फिरणारे प्रोपेलर आहेत हे विमान लांब पल्ल्याचे अंतरही कापू शकते.
Tu-22 हे एक हाय-स्पीड विमान आहे. हे विमान काही खास क्षेपणास्त्रे वाहून नेऊ शकते. A-50 हे एक दुर्मिळ आणि महागडे हेरगिरी करणारे विमान आहे. रशियाकडे अशी सुमारे 10 विमाने आहेत, ज्यांची किंमत प्रत्येकी सुमारे 350 मिलियन डॉलर एवढी आहे. याशिवाय, Tu-160, हे जगातील सर्वात मोठा बॉम्बर विमान आहे. जे १९८० च्या दशकात बनवण्यात आले होते. परंतु आजही रशियन हवाई दलातील सर्वात धोकादायक विमान मानले जाते. हे विमान अनेक शक्तिशाली क्षेपणास्त्रे वाहून नेण्यास सक्षम आहे.रशिया अथवा इतर कुठल्या देशाकडून अद्याप या हल्ल्याची अधिकृत पुष्टी करण्यात आलेली नाही. यामुळे काही माहिती बदलूही शकते. मात्र, हे खरे असेल, तर हा युक्रेनचा रशियाच्या हवाई शक्तीवरील आतापर्यंतचा सर्वात मोठा हल्ला मानला जाईल. याचवेळी, आपले ड्रोन उड्डाण करत राहतील आणि प्रत्युत्तर देत राहतील, असे युक्रेनने म्हटले आहे.