प्रक्षेपण सुरू असतानाच झाला होता हल्ला, आता इस्राइलच्या नाकावर टिच्चून त्या महिला अँकरने दिल्या बातम्या  

Israel-Iran conflict: एक महिला वृत्तनिवेदिका बातम्या सांगत असतानाच इस्त्राइलकडून हल्ला झाल्याचे थेट प्रक्षेपणादरम्यान दिसले होते. तसेच या हल्ल्यामुळे त्या महिला वृत्तनिवेदिकेला बातम्यांचं प्रसारण थांबवावं लागलं होतं. मात्र आता या वृत्तनिवेदिकेने पुन्हा एकदा जिद्दीने आपल्या कामास सुरुवात केली आहे.

इस्राइल आणि इराण यांच्यामध्ये सुरू असलेल्या संघर्षाने आता भीषण रूप धारण केलं आहे. यादरम्यान, सोमवारी इस्राइलने इराणची सार्वजनिक वृत्तसंस्था असलेल्या आयआरआयबीवर हल्ला केला होता. या हल्ल्याचा व्हिडीओसुद्धा समोर आला होता. ज्यामध्ये एक महिला वृत्तनिवेदिका बातम्या सांगत असतानाच हल्ला झाल्याचे थेट प्रक्षेपणादरम्यान दिसले होते. तसेच या हल्ल्यामुळे त्या महिला वृत्तनिवेदिकेला बातम्यांचं प्रसारण थांबवावं लागलं होतं. मात्र आता या वृत्तनिवेदिकेने पुन्हा एकदा जिद्दीने आपल्या कामास सुरुवात केली आहे. तसेच इस्राइलला पुन्हा एकदा आव्हान दिले आहे.

इस्राइलने केलेल्या हल्ल्यात इराणच्या नॅशनल टीव्ही कार्यालयाचं मोठ्या प्रमाणावर नुकसान झालं होतं. तसेच थेट प्रक्षेपणही थांबवावं लागलं होतं. या हल्ल्यात काही जणांचा मृत्यू झाल्याचंही सांगण्यात येत आहे. हा हल्ला झाला तेव्हा बातम्या देत असलेली एक वृत्तनिवेदिका लगबगीने स्टुडियोतून बाहेर पडताना दिली होती. मात्र आता ती पुन्हा एकदा कामावर परतली आहे. तसेच तिने बातम्याही दिल्या आहेत. या महिला वृत्तनिवेदिकेचं नाव सहर इमामी असं असून, ती आता इस्राइलच्या आक्रमणाला इराणकडून करण्यात येत असलेल्या प्रतिकाराचं प्रतीक बनली आहे.

दरम्यान, पुन्हा एकदा टीव्ही स्क्रिनवर दिसल्यावर सहम इराणी यांनी अधिक स्पष्ट आणि दृढपणे आपलं म्हणणं मांडलं. त्या म्हणाल्या की, जे काही घडलं ते इस्राइली सरकारकडून अभिव्यक्ती स्वातंत्र्याची गळचेपी करण्याचा हताश प्रयत्न होता. वृत्तसंस्थेच्या इमारतीवर हल्ला करून सत्याचा आवाज दाबता येणार नाही. आम्ही आमचं काम सुरूच ठेवणार आहोत. तसेच राष्ट्रीय वृत्तवाहिनी दृढपणे आपलं काम सुरू ठेवणार आहे, अशा शब्दात त्यांनी इस्राइलला आव्हान दिले.