सौदी अरेबियाने अमेरिकेला इराणवर हल्ला करण्यासाठी डिवचले, व्हाईट हाऊसमध्ये बंद दाराआड गुप्त बैठक झाली

इराण आणि अमेरिकेतील तणाव आणखी वाढला आहे. सौदी अरेबिया गुप्तपणे अमेरिकेला इराणविरुद्ध लष्करी कारवाई करण्यास प्रोत्साहित करत असल्याचे बोलले जात आहे. जर राष्ट्राध्यक्ष डोनाल्ड ट्रम्प यांनी इराणविरुद्धच्या धमक्यांचे पालन केले नाही तर इराणी राजवट आणखी मजबूत होईल, असे सौदीचे संरक्षण मंत्री प्रिन्स खालिद बिन सलमान यांनी वॉशिंग्टनमध्ये एका खाजगी ब्रीफिंगमध्ये सांगितली.

अमेरिकन माध्यमांनी सूत्रांच्या हवाल्याने दिलेल्या वृत्तानुसार, व्हाईट हाऊसमध्ये ही बैठक झाली, यामध्ये परराष्ट्र सचिव मार्को रुबियो, संरक्षण सचिव पीट हेगसेथ, व्हाईट हाऊसचे विशेष दूत स्टीव्ह विटकॉफ आणि जॉइंट चीफ ऑफ स्टाफचे अध्यक्ष जनरल डॅन केन उपस्थित होते. बैठकीचा मुख्य अजेंडा इराणवर अमेरिकेचा संभाव्य हल्ला आणि त्याचे प्रादेशिक परिणाम होता.

सौदी अरेबियाची ही भूमिका महत्त्वाची आहे कारण अलिकडच्या आठवड्यात रियाधने सार्वजनिकरित्या संयम आणि राजनैतिकतेचा पुरस्कार केला आहे. फक्त तीन आठवड्यांपूर्वी, सौदीचे क्राउन प्रिन्स मोहम्मद बिन सलमान यांनी ट्रम्प यांना प्रादेशिक युद्धाच्या धोक्याबद्दल चिंता व्यक्त केली होती,यामुळे अमेरिकेने हल्ला पुढे ढकलला होता. पण आता, सौदी नेतृत्वातील विचारसरणीत बदल दिसून येत आहे.

एमबीएसने अमेरिकेला सौदी हवाई क्षेत्र वापरण्यापासून रोखले

 इराणवर हल्ला करण्यासाठी अमेरिकेला सौदी अरेबियाच्या हवाई क्षेत्राचा वापर करण्याची परवानगी देणार नाहीत, असे मोहम्मद बिन सलमान यांनीही जाहीर केले होते. ही बंदी पहिल्यांदा एप्रिल २०२५ मध्ये लागू करण्यात आली होती, जेव्हा अमेरिकेने इराणच्या अणुस्थळांना लक्ष्य करण्याची योजना आखली होती. नंतर, त्यांना इतर हवाई तळांचा वापर करावा लागला. आता, जेव्हा इराणमध्ये सत्ता बदलण्याच्या उद्देशाने हल्ल्यांचे नियोजन केले जात आहे, तेव्हा सौदी अरेबिया आणि इतर आखाती देशांनीही अमेरिकेला त्यांच्या हवाई क्षेत्राचा वापर करण्यापासून रोखले आहे.