रशियानं निभावली मैत्री! युक्रेन युद्धात मदत करणाऱ्या हुकुमशाह किमसाठी बनवला सुंदर सागरी किनारा

रशिया आणि उत्तर कोरिया यांच्यातील ट्रेन सेवा पुन्हा सुरू होत आहे. उत्तर कोरियाने युक्रेन युद्धात रशियाच्या बाजूने लढण्यासाठी त्यांचे जवळपास १० हजार सैनिक पाठवले होते. 

जगापासून दूर, अज्ञातवासात राहणे पसंत करणाऱ्या उत्तर कोरियातील सौंदर्य, आर्किटेक्टर आणि तिथले समुद्र किनारे आता पर्यटकांसाठी खुले होणार आहे. उत्तर कोरिया हा परिसर जागतिक पर्यटकांसाठीही खुला करण्याची शक्यता आहे. २४ जूनला उत्तर कोरियाचा हुकुमशाह किम जोंग उनने देशातील उत्तरेकडील वोनसान कलमा(Wonsan Kalma) या सागरी किनाऱ्याला सार्वजनिक केले आहे. 

या सागरी किनाऱ्याचे अलौकिक सौंदर्य, निसर्गाने नटलेला परिसर जगभरात चर्चेचा विषय बनला आहे. परंतु उत्तर कोरिया आणि किम जोंग ऊन यांच्याविषयीही चर्चा सुरू आहे. किम जोंग ऊन यांची मुलगी किम जू ए(Kim Ju Ae) हिच्या हातात उत्तर कोरियाचा कारभार सोपवण्याची शक्यता आहे. २४ जूनला किम जोंग ऊन वोनसान कलमा बीचवर नजरेस आले तिथे त्यांच्यासोबत किम जून ए हीदेखील उपस्थित होती. तिला अशाप्रकारे प्रोटोकॉल दिला होता जशी ती आगामी काळात उत्तर कोरियाची उत्तराधिकारी आहे. विशेष म्हणजे किम जोंग उन पत्नी रि सोल जू यापण कार्यक्रमात उपस्थित होत्या परंतु त्या पतीजवळ फार कमी दिसून आल्या. 

जागतिक मीडियानुसार, वोनसान कलमा बीचचं बांधकाम कित्येक वर्षापासून सुरू होते. परंतु कोरोना काळात हे काम थांबले. त्यानंतर २०२४ साली रशियाने या कामात उत्तर कोरियाची मदत केली. त्यानंतर या बांधकामाने वेग पकडला. या पर्यटन स्थळाचे उद्घाटन सोहळ्यात उत्तर कोरियातील रशियाचे राजदूत आणि त्यांच्या अधिकाऱ्यांना विशेष पाहुणे म्हणून निमंत्रित केले होते. येत्या १ जुलैपासून हे पर्यटन केंद्र लोकांसाठी खुले केले जाईल. त्यात परदेशी पर्यटकांमध्ये रशियन नागरिकांना परवानगी देण्यात आली आहे. रशिया आणि उत्तर कोरिया यांच्यातील ट्रेन सेवा पुन्हा सुरू होत आहे. उत्तर कोरियाने युक्रेन युद्धात रशियाच्या बाजूने लढण्यासाठी त्यांचे जवळपास १० हजार सैनिक पाठवले होते. 

दरम्यान, किम जू ए सध्या उत्तर कोरियात लोकप्रिय होत आहे परंतु पुरुष प्रधान समाज असणाऱ्या उत्तर कोरियात सत्ता कायम पुरुषांकडेच राहिली आहे. किम जोंग उन यांच्याआधी त्यांचे वडील किम जोंग इल उत्तर कोरियात राज्य करत होते. उत्तर कोरियात अतिशय गोपनीय राजकीय व्यवस्था आहे. बंद खोलीत काही लोक मिळूनच निर्णय घेतात त्यात किम जू ए त्यांच्या वडिलांची उत्तराधिकारी असेल की नाही हे आता सांगता येत नाही. परंतु संभाव्य यादीत तिचे नाव सर्वात आघाडीवर असल्याचे सगळेच सांगतात. किम जोंग उन यांना ३ मुले आहेत. त्यातील मोठ्या मुलाचे नावही उत्तराधिकारी म्हणून पुढे येते परंतु सार्वजनिक ठिकाणी कधीही त्यांना पाहिले गेले नाही. किम जोंग उन यांची बहीण किम यो जोंग संभाव्य उत्तराधिकारी मानले जात होते परंतु अलीकडच्या काळात त्यांचेही कार्यक्रमात दिसणे कमी झाले आहे. 

कसा आहे वोनसान कलमा बीच?

उत्तर कोरियाच्या उत्तरेकडील वोनसान कलमा सागरी किनारा नवीन पर्यटन स्थळ बनले आहे. कोरिया सध्या पर्यटनाला चालना देण्याचा प्रयत्न करत आहे. त्यातूनच हा सागरी किनारा विकसित केला गेला आहे. नैसर्गिक सौंदर्य, आधुनिक वास्तूकला यासाठी हा परिसर ओळखला जातो. उत्तर कोरियातील आर्थिक आणि सांस्कृतिक महत्त्व यातून दिसून येते. याठिकाणी अत्याधुनिक हॉटेल, वॉटरपार्क आणि २० हजार लोकांच्या राहण्याची व्यवस्था करण्यात आली आहे. याठिकाणी परदेशी पर्यटकांमध्ये केवळ रशियातील नागरिकांना येण्याची परवानगी आहे.