'पंतप्रधान नरेंद्र मोदी यावर्षी रशियाच्या दौऱ्यावर येऊ शकतात', असे विधान रशियाचे परराष्ट्र मंत्री सर्गेई लावरोव यांनी केले आहे. इराण विरुद्ध इस्रायल-अमेरिका युद्ध शिगेला असतानाच लावरोव यांनी मोदींच्या रशिया दौऱ्याची आशा व्यक्त केली. भारताने पुन्हा रशियाकडून तेल खरेदी सुरू केल्यानंतर पहिल्यांदाच रशियाकडून भाष्य करण्यात आले आहे.
सर्गेई लावरोव यांनी सोमवारी एका व्हिडीओ संदेशात म्हटले की, "आम्ही पंतप्रधान नरेंद्र मोदी हे यावर्षीही रशियात येतील, याची वाट बघत आहोत. रशियाला आशा आहे की, भारताचे पंतप्रधान नरेंद्र मोदी चालू वर्षातही रशियात येतील."
'रशिया आणि भारत: द्विपक्षीय संबंध नव्या उद्दिष्टांच्या दिशेने' या आंतरराष्ट्रीय संमेलनाला शुभेच्छा देणारा संदेश सर्गेई लावरोव यांनी पाठवला. भारताचे परराष्ट्र मंत्री एस. जयशंकर यांनीही या संमेलनाच्या उद्घाटन प्रसंगी सांगितले की, दोन्ही देशांचा संबंध वृद्धिंगत करण्यावर आणि व्यापार वाढवण्यावर भर आहे.
"भारत आणि रशिया सध्याच्या वार्षिक व्यापार (६८.७ अरब अमेरिकन डॉलर) हा २०३० पर्यंत १०० अरब अमेरिकन डॉलरपर्यंत नेण्यासाठी कटिबद्ध आहेत", असे एस. जयशंकर म्हणाले.
भारतासमोर अनेक अप्रत्यक्ष आव्हाने -मोदी
एकीकडे 'रशिया आणि भारत' संमेलन सुरू असताना पंतप्रधान नरेंद्र मोदी यांनी सध्या मध्य पूर्वेत सुरू असलेल्या युद्धाबद्दल लोकसभेत निवेदन केले.
पंतप्रधान मोदी म्हणाले की, "पश्चिम आशियामधील परिस्थिती चिंताजनक आहे. तीन आठवड्यांपासून अधिक काळ या संकटाला झाला आहे. या युद्धामुळे संपूर्ण जगाच्या अर्थव्यवस्थेवर आणि लोकांच्या जगण्यावर परिणाम झाला आहे."
"भारतासमोरही या युद्धाने अप्रत्यक्ष आव्हाने उभी केली आहेत. ही आव्हाने अर्थव्यवस्थेशी संबंधित, राष्ट्रीय सुरक्षेशी संबंधित आहेत. त्याचबरोबर माणुसकीच्या अनुषंगानेही आव्हाने उभी ठाकली आहेत", असे पंतप्रधान मोदी यांनी संसदेत सांगितले.
"युद्धाच्या झळा बसत असलेल्या देशात भारतीय आहेत. तेथील भारतीयांशी उच्चायुक्तालय २४ संपर्कात आहे. त्यांची मदत केली जात आहे. युद्ध सुरू झाल्यापासून आतापर्यंत ३ लाख ७५ हजार भारतीय सुरक्षितपणे मायदेशात परतले आहेत", अशी माहिती मोदींनी सभागृहात दिली.
रशियाकडून तेल खरेदी सुरू
अमेरिकेने भारताला रशियाकडून तेल खरेदी करण्यास मनाई केली होती. मात्र, इराण युद्धामुळे आखाती देशातून होणारा तेल पुरवठा विस्कळीत झाला. युद्धजन्य परिस्थितीमुळे अमेरिकेने भारताला ३० दिवस रशियाकडून तेल खरेदी करण्यास मोकळीक दिली आहे.
त्यामुळे आता भारत रशियाकडून कच्च्या तेलाची खरेदी करत आहे. तर आखाती देशातून एलपीजीची आयात करणे कठीण बनल्याने अमेरिकेकडून एलपीजी खरेदी केली जात आहे.
Web Summary : Russia anticipates Prime Minister Modi's visit this year, stated Foreign Minister Lavrov amidst Iran-Israel tensions. India and Russia aim for $100 billion trade by 2030. Modi addressed India's challenges due to the Middle East conflict, ensuring citizen safety. India resumes Russian oil purchases.
Web Summary : रूस को प्रधानमंत्री मोदी के इस साल दौरे की उम्मीद है, लावरोव ने ईरान-इजरायल तनाव के बीच कहा। भारत और रूस का लक्ष्य 2030 तक 100 अरब डॉलर का व्यापार है। मोदी ने मध्य पूर्व संघर्ष के कारण भारत की चुनौतियों को संबोधित किया, नागरिकों की सुरक्षा सुनिश्चित की। भारत ने रूसी तेल की खरीद फिर से शुरू की।