कराचीला भूकंपाचे धक्क्यावर धक्के! फायदा घेऊन २१६ कैदी पळाले; तुरुंग अधिकारी मशिदींत पोहोचले... 

Pakistan News: पाकिस्तानात सोमवारी रात्री उशिरा सौम्य भूकंपाचे धक्के जाणवत होते. अनेक कैदी आधीपासूनच बॅरेकबाहेर आले होते.

सोमवारी रात्री उशिरा भूकंपानेपाकिस्ताना हादरला आहे. फार मोठे नुकसान झालेले नसले तरी पाकिस्तानात खळबळ उडाली आहे. कराचीच्या तुरुंगातूनभूकंपाचा फायदा घेऊन तब्बल २१६ कैदी पळाले आहेत. यामुळे मालीर जिल्हा कारागृह प्रशासनाची भंबेरी उडाली असून या कैद्यांना पकडण्यासाठी मोहिम राबविण्यात येत आहे. 

सोमवारी रात्री उशिरा सौम्य भूकंपाचे धक्के जाणवत होते. अनेक कैदी आधीपासूनच बॅरेकबाहेर आले होते. भूकंपाचे धक्के बसू लागताच तुरुंगात गोंधळ उडाला, याचा फायदा या कैद्यांनी घेण्यास सुरुवात केली. यामुळे तुरुंग कर्मचाऱ्यांवर दबाव आला आणि झटापट सुरु झाली. याचा फायदा घेत २१६ कैद्यांनी पळून जाण्यात यश मिळविले. 

कैद्यांना रोखण्यासाठी तुरुंगात गोळीबारही करण्यात आला. या झटापटीत एका कैद्याचा मृत्यू झाला आहे. तर पाच अधिकारी जखमी झाले आहेत. यानंतर लगेचच पोलीस आणि पाकिस्तानी रेंजर्सनी तुरुंगाच्या आजुबाजुच्या भागाचा ताबा घेतला आहे. यावेळी सर्च ऑपरेशनमध्ये ८० कैद्यांना पकडण्यात आले आहे. राष्ट्रीय महामार्गासह अनेक मार्ग तात्पुरते बंद करण्यात आले आहेत.

पोलिस आणि निमलष्करी दलांचा मोठा ताफा काही मिनिटांतच तुरुंगात पोहोचला आणि जवळपासच्या वस्त्या, महामार्ग आणि गावे सील करण्यात आल्याचे एसएसपी मालीर काशिफ आफताब अब्बासी यांनी प्रसारमाध्यमांना सांगितले. याचबरोबर पळून गेलेल्या कैद्यांना पकडण्यासाठी जनतेने सहकार्य करण्याचे आवाहन मशीदींच्या भोंग्यांवरून करण्यात येत आहे. 

सर्कल क्रमांक ४ आणि ५ मधील ६०० हून अधिक कैदी त्यांच्या बॅरेकबाहेर बसले होते. भूकंप सुरु झाल्यानंतर पळून जाण्याच्या मानसिकतेचे कैदी गोंधळ घालू लागले. या अफरातफरीत मोठा गोंधळ उडाला आणि तुरुंगातच पळापळ सुरु झाली. तुरुंग प्रशासनाकडे तेवढी सुरक्षा व्यवस्था नव्हती. यामुळे हे कैदी बाहेर पळून गेल्याचे, वृत्त पाकिस्तानी साम टीव्हीने दिले आहे.