क्रिकेटपटूंचा जीव घेतल्यानंतर पाकिस्तानचा अफगाणिस्तानसोबत युद्धविराम; या दोन देशांची मध्यस्थी...

Pakistan-Afghanistan Ceasefire: दोहा येथे कतार आणि तुर्कीच्या मध्यस्थीने झालेल्या यशस्वी शांतता चर्चेनंतर पाकिस्तान आणि अफगाणिस्तानने तात्काळ युद्धविराम लागू करण्याचा निर्णय घेतला आहे. सीमा संघर्षावर नियंत्रण मिळवण्याचा हा महत्त्वपूर्ण पाऊल.

दोहा, कतार: पश्चिम आशियातील दोहा येथे पार पडलेल्या अत्यंत महत्त्वपूर्ण शांती वार्तेनंतर पाकिस्तान आणि अफगाणिस्तानने सीमावर्ती भागातील तीव्र संघर्षाला तात्काळ विराम देण्याचा निर्णय घेतला आहे. गेल्या एका आठवड्यापासून सुरू असलेल्या भीषण चकमकींमुळे दोन्ही देशांमधील संबंध कमालीचे ताणले गेले होते, ज्यात अनेक नागरिकांना आणि सैनिकांना जीव गमवावा लागला होता.

कतार आणि तुर्की या दोन देशांनी केलेल्या यशस्वी मध्यस्थीमुळे हा रक्तरंजित तणाव थंडावला आहे. कतारच्या परराष्ट्र मंत्रालयाने रविवारी पहाटे या निर्णायक कराराची घोषणा केली. दोन्ही राष्ट्रांनी केवळ तात्काळ युद्धविराम लागू करण्यावरच नव्हे, तर त्याची स्थिरता सुनिश्चित करण्यासाठी आणि  अंमलबजावणीसाठी आगामी दिवसांत बैठका घेण्यावरही सहमती दर्शवली आहे.

२०२१ मध्ये काबूलमध्ये तालिबानने सत्ता काबीज केल्यानंतर दोन्ही देशांमध्ये झालेला हा सर्वात भीषण सीमा संघर्ष होता. या शांतता चर्चेमुळे दोन्ही देशांनी हिंसाचाराचा मार्ग सोडून संवादाच्या माध्यमातून समस्या सोडवण्याची तयारी दर्शवली आहे, जे संपूर्ण मध्य-पूर्वेकडील शांततेच्या दृष्टीने एक महत्त्वपूर्ण पाऊल मानले जात आहे. दोन दिवसांपूर्वीच्या हल्ल्यात अफगाणिस्तानचे क्रिकेटपटू मारले गेले होते. यामुळे जागतिक स्तरावरून पाकिस्तानवर टीका होऊ लागली होती.