भारताच्या मित्र देशात सत्तांतराचं मोठं षडयंत्र अयशस्वी; प्रमुख आर्कबिशप यांच्यासह १४ जण अटकेत

पंतप्रधान पाशिनियान आणि प्रभावशाली आर्मेनियन अपोलोस्टिक चर्च यांच्यातील वाढत्या तणावाच्या पार्श्वभूमीवर या अटक करण्यात आल्या आहेत.

येरेवन - आर्मोनियात सत्ता उलथवून लावण्याचा प्रयत्न अयशस्वी करून १४ जणांना अटक केल्याचा दावा तिथल्या अधिकाऱ्यांनी केला आहे. या अटक केलेल्या लोकांमध्ये ईसाई धर्मगुरू आर्कबिशप बगरात गॅल्स्टैनियन आणि एका खासदाराचा प्रमुख सहभाग आहे. सुरक्षा दलाने एका वरिष्ठ धर्मगुरूशी संबंधित सत्तांतराचा कट उधळून लावला आहे. आर्मेनियाच्या तपास समितीनुसार गॅल्स्टैनियन आणि इतर १५ जणांवर दहशतवादी हल्ल्याचे षडयंत्र आणि सत्ता काबीज करण्यासाठी आवश्यक असलेली साधने, उपकरणे जमा केल्याबद्दल गंभीर आरोप दाखल केले आहेत असं आर्मेनियाचे पंतप्रधान निकोल पाशिनयान यांनी सांगितले. आर्मेनिया आणि भारत यांच्यात खूप जवळचे धोरणात्मक संबंध आहेत आणि हा देश भारतीय शस्त्रास्त्रांचा एक प्रमुख खरेदीदार आहे.

देशात हल्ला करून दंगल घडवण्याचा कट

कथित षडयंत्रानुसार, आर्मोनिया देशातील महत्त्वाच्या ठिकाणांवर हल्ला करणे, मोठ्या प्रमाणात दंगल पेटवणे, सरकारी वेबसाईटवर सायबर हल्ला यासारख्या विविध योजना बनवून त्यासाठी २०० बंडखोरांचा गट तयार करण्यात आला होता. जानेवारी २०२५ पासून जवळपास १ हजार जण या कटात सहभागी झालेत. त्यामुळे या पुढच्या काळात या प्रकरणात आणखी मोठ्या संख्येने लोकांना अटक होऊ शकते असं अधिकाऱ्यांनी म्हटलं.

पाशिनियान आणि चर्चेमध्ये संघर्ष

पंतप्रधान पाशिनियान आणि प्रभावशाली आर्मेनियन अपोलोस्टिक चर्च यांच्यातील वाढत्या तणावाच्या पार्श्वभूमीवर या अटक करण्यात आल्या आहेत. अलीकडच्या काळात दोन्ही बाजूंनी एकमेकांवर आरोप प्रत्यारोप करण्यात आले होते. २०२० मध्ये काराबाख प्रदेशात अझरबैजानकडून आर्मेनियाचा लष्करी पराभव झाल्यानंतर पाशिनियान आणि चर्चमधील वाद निर्माण झाला, त्यानंतर चर्चने पंतप्रधानांच्या राजीनाम्याची मागणी करण्यास सुरुवात केली. २०२३ मध्ये अझरबैजानने या प्रदेशावर पूर्ण नियंत्रण मिळवल्यानंतर हा वाद वाढला. पाशिनियान अझरबैजानसोबत शांतता करारासाठी जोर धरण्यास सुरुवात केली आहे. त्यानंतर आर्मेनिया काराबाखवरील आपले दावे सोडेल. अनेक आर्मेनियन लोक या प्रदेशाला त्यांच्या पूर्वजांची भूमी मानतात.

अपोलोस्टिक चर्चचा आर्मोनियात खूप प्रभाव आहे. चौथ्या शतकापासून ईसाई धर्माचा प्रभाव असणारे हे पहिले राष्ट्र बनले आहे. विरोधी चळवळ 'सेक्रेड स्ट्रगल'चे नेतृत्व करणाऱ्या गॅल्स्ट्रनियन यांनी गेल्या वर्षी काराबाख अझरबैजानला सोपवल्याचा आरोप पाशिनियानवर केला आणि मोठ्या प्रमाणात निदर्शने केली. त्यांचे वकील रुबेन मेलिक्यान यांनी या अटकेचा निषेध केला  कारण ही अटक राजकीयदृष्ट्या प्रेरित होती असा आरोप करण्यात आला. आता तपास समितीने गॅल्स्ट्रेनियन सेक्रेड स्ट्रगल आंदोलनाशी संबंधित ९० हून अधिक ठिकाणी धाड टाकली. त्यात १४ जणांना अटक केली आहे. १६ संशयितांविरोधात तपास सुरू आहे. या छापेमारीत बंदूक, दारूगोळा साठा जप्त केल्याची माहिती समोर आणली आहे.