एक डॉलर प्रति बॅरल, त्यासोबत..., होर्मुझवरील टोलसाठी इराणने तयार केला असा नियम   

Iran War News: अमेरिका आणि इराण यांच्यात सुरू असलेल्या संघर्षादरम्यान काल दोन आठवड्यांचा युद्धविराम लागू झाला होता. त्यानंतर आता जगभरातील इंधन वाहतुकीचा प्रमुख मार्ग असलेल्या होर्मुझच्या सामुद्रधुनीवरील आपली पकड मजबूत करण्यासाठी इराणने प्रयत्न सुरू केले आहेत.

अमेरिका आणि इराण यांच्यात सुरू असलेल्या संघर्षादरम्यान काल दोन आठवड्यांचा युद्धविराम लागू झाला होता. त्यानंतर दोन्ही बाजूंनी आपापल्या विजयाचे दावे करण्यात येत आहेत. यादरम्यान जगभरातील इंधन वाहतुकीचा प्रमुख मार्ग असलेल्या होर्मुझच्या सामुद्रधुनीवरील आपली पकड मजबूत करण्यासाठी इराणने प्रयत्न सुरू केले आहेत. त्याबरोबरच होर्मुझमधून प्रवास करणाऱ्या तेलवाहू जहाजांकडून एक डॉलर प्रति बॅरल दराने टोल आकारण्याची योजना आखली आहे. एवढंच नाही तर ते क्रिप्टोकरंसीमध्ये वसूल करण्याची तयारी इराणने केली आहे.

अमेरिका-इस्राइल विरुद्ध इराण यांच्यात सुरू असलेल्या संघर्षामध्ये अल्पकाळासाठी युद्धविराम जाहीर झाल्यानंतर जगभरातील बाजारांची नजर ही होर्मुझच्या सामुद्रधुनीतून जाणाऱ्या जलमार्गाकडे लागली आहे. युद्धविरामामुळे अमेरिका आणि इराणमधील संघर्ष थांबला असला तरी इराण होर्मुझमधील आपलं वर्चस्व सोडण्यास तयार नाही आहे. तसेच या मार्गावरून जाणाऱ्या प्रत्येक जहाजाची कसून तपासणी केली जाणार आहे, जहाजातील सामानाची पूर्ण तपासणी केल्यानंतरच या जहाजाला पुढे जाण्याची परवानगी दिली जाईल, असे  इराणच्या तेल आणि गॅस निर्यात संघाने सांगितले आहे. युद्धविरामाच्या दोन आठवड्यांच्या काळाचा वापर हत्यारांची वाहतूक करण्यासाठी तर केला जात नाही आहे ना, याची खातरजमा करण्यासाठी जहाजांची तपासणी केली जाणार आहे, असे इराणी अधिकाऱ्यांनी सांगितले आहे.

इराणने लागू केलेल्या नव्या नियमावलीनुसार प्रत्येक जहाजाला एका ईमेलमधून जहाजातील प्रत्येक सामानाबाबत सविस्तर माहिती इराणला द्यावी लागणार आहे. त्यानंतर संबंधित जहाजावर किती टोल आकारावा याचा निर्णय अधिकारी घेतील. तसेच टोल भरण्यासाठी खूप कमी वेळ दिली जाईल. ही प्रक्रिया पूर्ण करण्यासाठी जहाजांना किती वेळ लागला तरी हरकत नाही, आम्हाला कुठलीही घाई नसेल, असेही इराणने स्पष्ट केले आहे.